14.2. Ойн асуудал хариуцсан төрийн захиргааны байгууллага нь ойг хамгаалах, нөхөн сэргээх, ашиглах талаар дараах бүрэн эрхийг хэрэгжүүлнэ:
14.2.1. ойг хамгаалах, ашиглах, нөхөн сэргээх, үржүүлэх талаарх хууль тогтоомж, эрх бүхий төрийн байгууллагын шийдвэрийг хэрэгжүүлэх, ойн аж ахуйн арга хэмжээг удирдан зохион байгуулах, мэргэжил, арга зүйн нэгдсэн удирдлагаар хангах;
14.2.2. улсын ойн менежментийн төлөвлөгөөг боловсруулах, бүсийн ойн менежментийн төлөвлөгөөг батлах, уялдаа холбоог хангах, хэрэгжилтэд хяналт-шинжилгээ, үнэлгээ хийх;
14.2.3. улсын ойн менежментийн төлөвлөгөөг хэрэгжүүлэхэд шаардагдах зардлыг улсын болон орон нутгийн төсөвт тусгуулж, санхүүжүүлэх;
14.2.4. ойг хамгаалах, нөхөн сэргээх, үржүүлэх, ашиглах зориулалтаар улсын төсвөөс олгосон хөрөнгийг хуваарилах, зарцуулалтад хяналт тавих, гүйцэтгэлийг тайлагнах;
14.2.5. ойн аж ахуйн арга хэмжээний стандарт, журам, заавар, аргачлал, удирдамж боловсруулах, батлах, хэрэгжилтэд хяналт тавих;
14.2.6. ойн салбарын ажилтныг давтан сургах, мэргэжил дээшлүүлэх, мэргэшлийн зэрэг олгох ажлыг зохион байгуулах;
14.2.7. ойн аж ахуйн арга хэмжээг хэрэгжүүлэх шинэ техник, технологийг судлах, шинэ бүтээгдэхүүн хөгжүүлэх, бүтээмжийг нэмэгдүүлэх, техник, технологийн дэвшлийг дамжуулах, нутагшуулах, шинжлэх ухаан, технологийн судалгааны үр дүн, инновацийн бүтээгдэхүүн, үйлчилгээг үйлдвэрлэлд нэвтрүүлэхэд дэмжлэг үзүүлэх;
14.2.8. таримал ой ургуулах төрийн бодлогыг хэрэгжүүлэх, мэргэжил арга зүй, удирдлага зохион байгуулалтаар хангах, талуудын уялдаа холбоог зохицуулах, хяналт-шинжилгээ, үнэлгээ хийх;
14.2.9. агро-ойн ойн аж ахуйг кластер хэлбэрээр зохион байгуулах, мэргэжил арга зүйгээр хангах, талуудын уялдаа холбоог зохицуулах, хяналт-шинжилгээ, үнэлгээ хийх;
14.2.10. ойн аж ахуйн арга хэмжээ”-ний зураг төсөл, техник эдийн засгийн үндэслэлд магадлал хийх ажлыг зохион байгуулах, эрх олгох, баталгаажуулах;
14.2.11. модлог ургамлын үрийн улсын нөөцийн сан байгуулах, баяжуулах, үйл ажиллагааг эрхлэх, үржлийн материал үйлдвэрлэх нэгдсэн бодлогыг хэрэгжүүлэх;
14.2.12. модлог ургамлын үр, үржлийн материалын гарал үүслийн болон чанарын гэрчилгээний загварыг боловсруулах, хэрэгжилтийг зохион байгуулах;
14.2.13. ой, хээрийг түймэр, хөнөөлт шавжийн тархалт, ойн нөөцийн хомсдол, газрын доройтол, бохирдлоос урьдчилан сэргийлэх, хамгаалах, ойн ашиглалттай холбоотой гарсан зөрчлийг таслан зогсоох үйл ажиллагааг төлөвлөн зохион байгуулж, хэрэгжилтэд хяналт тавих;
14.2.14. ой, хээрийн түймрийн аюултай үед ой, хээрийн түймрээс сэрэмжлүүлэх, эргүүл, харуул ажиллуулах, бүх нийтийг татан оролцуулах талаар нутгийн захиргааны байгууллагатай хамтран ажиллах, түймрийн аюулын анги, зэрэглэлийг үндэслэн аймаг, нийслэлийн нутаг дэвсгэрт тодорхой үйл ажиллагааг зогсоох, хязгаарлах тухай саналыг аймаг, нийслэлийн Засаг даргад тавьж, шийдвэрлүүлэх;
14.2.15. ой, хээрийн түймрээс хамгаалах, урьдчилан сэргийлэхтэй холбогдсон хууль тогтоомжийг сурталчлах, иргэд, ойн нөхөрлөл, аж ахуйн нэгж, байгууллагыг ой, хээрийн түймэр унтраах арга ажиллагаанд сургах ажлыг онцгой байдлын асуудал эрхэлсэн төрийн захиргааны байгууллагатай хамтран хэрэгжүүлэх;
14.2.16. хил дамнасан ой, хээрийн түймрээс урьдчилан сэргийлэх, унтраах талаар бусад улстай гэрээ, хэлэлцээр байгуулж, хамтран ажиллах;
14.2.17. цаг агаарын болон ой, хээрийн түймрийн цагийн байдлын тухай мэдээллээр холбогдох байгууллага, хүн амыг хангах;
14.2.18. ашиглалтын бүсийн ойн менежментийг сайжруулах, ойн нөөцийг иж бүрэн, хаягдалгүй ашиглахтай холбоотой ойн техник, технологийг нэвтрүүлэх, хөгжүүлэх;
14.2.19. ойн экологи, эдийн засгийн үнэлгээг боловсруулах;
14.2.20. энэ хуулийн 7.2-т заасны дагуу ойн тооллого, ой зохион байгуулалт хийх, ойн мониторингийн системийг хөгжүүлэх, ойн сангийн өөрчлөлтөд хяналт, шинжилгээ хийх;
14.2.21. ойн мэдээллийн нэгдсэн сан хөтлөх, бүрдүүлэх, баяжуулах, мэдээллээр хангах;
14.2.22. таримал ойг улсын ойн санд хүлээн авах;
14.2.23. бүсийн ойн аж ахуй, ойн ангийн үлгэрчилсэн дүрмийг батлах;
14.2.24. Төрийн албаны тухай хуулийн 22, 23 дугаар зүйлд заасан шаардлага хангасан иргэнийг бүсийн ойн аж ахуйн даргаар шууд, ойн ангийн даргаар аймаг, нийслэлийн Засаг даргатай зөвшилцөн томилох, чөлөөлөх;
14.2.25. бүсийн ойн аж ахуй, ойн анги, ойн нөхөрлөл, ойн мэргэжлийн байгууллагад мэргэжил, арга зүйн туслалцаа үзүүлэх, үйл ажиллагаанд нь хяналт тавих, дүгнэлт гаргах;
14.2.26. ойн мэргэжлийн байгууллагын эрх олгох, сунгах, хүчингүй болгох;
14.2.27. мод тарьж ургуулах үйл ажиллагаа эрхэлж буй ойн нөхөрлөл, ойн мэргэжлийн байгууллага, иргэн, аж ахуйн нэгж, байгууллагад газар эзэмших, санхүүгийн цогц дэмжлэг үзүүлэх, мөнгөн урамшуулал олгох тогтолцоог хөгжүүлэх;
14.2.28. ойн нөөцийг хамгаалах дотоод хяналтыг зохион байгуулах.”
