12.1. Төрийн байгууллага нь иргэдэд үйлчилгээ үзүүлэхэд болон хуульд заасан чиг үүргээ гүйцэтгэхэд дараах үүрэгтэй:
12.1.1. саадгүй орчин, хүртээмжтэй үйлчилгээг бүрдүүлэх;
12.1.2. ажилтнууддаа хөгжлийн бэрхшээлтэй хүний эрх, хөгжлийн бэрхшээлийн онцлог хэрэгцээ, хүртээмж, боломжит тохируулгын талаарх сургалтанд тогтмол хамруулах;
12.1.3. хэрэглэгчийн санал, гомдлыг хүртээмжтэй хэлбэрээр хүлээн авах, шийдвэрлэх;
12.1.4. үйлчилгээний онцлогт нийцсэн туслах технологи, боломжит тохируулга, хувилбарт аргыг ашиглах;
12.1.5. хүн туслах хэрэгсэлтэйгээ тухайн байгууллагад нэвтрэх, шаардлагатай тохиолдолд тухайн хүний асран хамгаалагч, хувийн туслах, хөтөч, хөтөч нохой хамт болон байнга хэрэглэдэг, овор ихтэй, туслах бүтээгдэхүүнээ ашиглаж үйлчилгээ авах боломжийг бүрдүүлэх;
12.1.6. хөгжлийн бэрхшээлтэй иргэн, ахмад настан, жирэмсэн эмэгтэй, асран хамгаалагчид түрүүлж, дараалал багатай үйлчлүүлэхэд зориулагдсан тусгай касс/цонх ажиллуулах;
12.1.7. хөгжлийн бэрхшээлтэй иргэн, ахмад настан, жирэмсэн эмэгтэй, асран хамгаалагчид түрүүлж, дараалалгүй үйлчлүүлэх тусгай касс, цонхыг ажиллуулж, налуу зам, намсгасан тавцан, сонсголын бэрхшээлтэй иргэнд зориулсан дохио, бичгэн харилцаа болон тод тэмдэглэгээг стандартын дагуу хангах;
12.1.8. нийтийн тээвэр, буудал, терминалын хүлээлгийн орчныг биеийн онцлог бүхий иргэдийн хэрэгцээнд нийцүүлэн төлөвлөж, тэргэнцэртэй иргэн чөлөөтэй байрших боломжтой зайг хангах, нуруу түшлэгтэй, гарын тулгууртай суудлаар тоноглох, мөн чимээ шуугиан, хүний хөдөлгөөний ачаалал багатай хүлээлгийн хэсгийг стандартын шаардлагад нийцүүлэн бүрдүүлэх.
12.2. Төрийн захиргааны төв байгууллага нь төрийн бүх шатны байгууллага, аж ахуйн нэгж, төрийн өмчит болон олон нийтийн байгууллага, холбоо, иргэний нийгмийн байгууллагын ажилтнуудыг саадгүй, хүртээмжтэй үйлчилгээ үзүүлэх мэдлэг, ур чадвар олгох сургалтад хамруулахыг дэмжинэ.
12.3. Төрийн үйлчилгээнд хуульд заасны дагуу иргэдэд үзүүлж буй бүтээгдэхүүн, үйлчилгээ, үйл ажиллагаа хамаарна.
12.4. Төрийн үйлчилгээний байгууллагын барилга, байгууламжийн иргэдтэй харилцах, үйлчилгээ үзүүлэх хэсэгт саадгүй зорчих орчныг бүрдүүлж, нэвтрэх тоног төхөөрөмж, туслах хэрэгслээр хангаж, ойлгомжтой тэмдэг, чиглүүлэг байршуулан хөгжлийн бэрхшээлтэй иргэд, ахмад настанд хүртээмжтэй үйлчилгээ үзүүлнэ.
12.5. Төрийн үйлчилгээ нь дижитал хэлбэрийг нэвтрүүлэхийн зэрэгцээ хөгжлийн бэрхшээлтэй иргэд, ахмад настнуудад зориулан газар дээр нь зөвлөх, бичгээр болон гараар гүйцэтгэх уламжлалт үйлчилгээний хэлбэрийг хадгална.
Тайлбар: Энэ зүйлд заасан “хувилбарт арга” гэж энгийн ойлгомжтой хэллэгээр ярих, дохио зангаагаар хариулах боломжтой хэлбэрээр харилцах, дохионы хэл, бичгийг ярианд, яриаг бичигт хөрвүүлэх технологи ашиглах, харилцааны самбар, тэмдэг тэмдэглэгээ, дүрс ашиглах, дүрст дуудлага, хөтөч ашиглахыг хэлнэ.
