6.1. Үндэсний номын сангийн зорилго нь Монгол Улсын үндэсний ой санамж, баримтат өвийг бүрэн бүрдүүлж, бүртгэн, хадгалж, хамгаалан хойч үед өвлүүлэх, мэдлэг, мэдээллийг тэгш хүртээмжтэй хүргэх замаар хүний оюуны хөгжил, боловсрол, шинжлэх ухаан, соёл, хүмүүнлэг, иргэний, ардчилсан нийгмийн хөгжилд хувь нэмэр оруулахад оршино.
6.2. Үндэсний номын сан дараах үндсэн чиг үүргийг хэрэгжүүлнэ:
6.2.1. Номын сангийн тухай хуулийн 17 дугаар зүйлд заасан заавал авах хувийг хүлээн авч, бүртгэх, хадгалах, хамгаалах;
6.2.2. Монгол Улсын иргэн, хуулийн этгээдийн гадаад улсад хэвлэн нийтэлсэн бүтээл, түүнчлэн Монгол Улс, монгол үндэстэн, монгол хэл, бичиг үсэг, түүх, соёл, монгол судлалд холбогдох гадаадад хэвлэгдсэн бүтээлийг сурвалжлан олж, худалдан авах, солилцох, хандив, бэлэглэл болон бусад хууль ёсны хэлбэрээр үндэсний сан хөмрөгт нөхөн бүрдүүлэх;
6.2.3. үндэсний болон олон улсын ач холбогдол бүхий шинжлэх ухаан, боловсрол, соёл, урлаг, утга зохиолын бүтээл болон мэдээллийн бусад эх сурвалжийг сонгон сан хөмрөг бүрдүүлэх;
6.2.4. сан хөмрөгт байгаа баримтат өв, бүтээлийг олон улсын стандартын дагуу бүртгэх, ангилах, сэдэвжүүлэх, тайлбарлах, каталогжуулах;
6.2.5. сан хөмрөгийн эх материал, агуулга, бүрдэл, гарал үүсэл, жинхэнэ байдал, бүрэн бүтэн байдлыг хадгалж, тохирсон орчин, горим, технологийн дагуу урт хугацаанд хамгаалах;
6.2.6. үндэсний сан хөмрөгт байгаа гэмтэж, муудсан, устаж үрэгдэх эрсдэлтэй бүтээлийг бэхжүүлэх, сэлбэн засах, сэргээн засварлах, хуулбар болон хамгаалалтын хувь үйлдэх;
6.2.7. үндэсний ном зүйг бүрдүүлэх, хөтлөх, тогтмол хэвлэн нийтлэх, үндэсний ном зүйн нэгдсэн мэдээллийн санг байгуулах, хөгжүүлэх;
6.2.8. Монгол Улсын нийтийн номын сангуудын сан хөмрөгийн ном зүй, байршлын мэдээллийг нэгтгэсэн төв каталогийг байгуулах, хөтлөх, харилцан мэдээлэл солилцох нөхцөлийг бүрдүүлэх;
6.2.9. сан хөмрөгийн хэвлэмэл, гар бичмэл, дуу, дүрс, бичлэг болон бусад эх материалыг хуульд заасан үндэслэл, журмын дагуу цахим хэлбэрт шилжүүлж, цахим сан хөмрөг бүрдүүлэх;
6.2.10. цахим хэлбэртэй бүтээлийн заавал авах хувийг хүлээн авах, бүртгэх, хадгалах, хамгаалах, технологийн өөрчлөлтөөс үл хамааран урт хугацаанд ашиглах нөхцөлийг хангах;
6.2.11. цахим сан хөмрөгийн бүрэн бүтэн, үнэн зөв, аюулгүй, хүртээмжтэй, урт хугацаанд ашиглах боломжтой байдлыг хангах хадгалалтын дижитал сан, нөөцлөлт болон сэргээх тогтолцоог бүрдүүлэх;
6.2.12. үндэсний сан хөмрөг, сан хөмрөг, үндэсний ном зүй, төв каталог болон бусад мэдээллийн санг хуульд заасан нөхцөл, журмын дагуу танхимаар болон цахимаар ашиглуулах;
6.2.13. иргэн, байгууллага, эрдэм шинжилгээ, боловсрол, соёлын байгууллагад ном зүй, лавлагаа, мэдээлэл, судалгааны үйлчилгээ үзүүлэх;
6.2.14. хөгжлийн бэрхшээлтэй хүн болон мэдээлэл авахад бусад саад бэрхшээлтэй уншигчид зориулсан тохирох хэлбэр, технологи, орчин бүхий номын сангийн үйлчилгээ үзүүлэх, хөгжүүлэх;
6.2.15. үндэсний сан хөмрөгт тулгуурлан номын сан, ном зүй, баримтат өв, монгол судлал, эх бичиг, хадгалалт, хамгаалалт, сэргээн засварлалт болон цахим хадгалалтын чиглэлээр эрдэм шинжилгээ, судалгаа хийх, судалгааны үр дүнг нийтэд түгээх;
6.2.16. хосгүй үнэт, үнэт зэрэглэлд хамаарах, ховор, ганц хувь болон тусгай хамгаалалт шаардах бүтээлийг судлах, хамгаалах, ашиглуулах тусгай дэглэм тогтоож мөрдүүлэх;
6.2.17. сан хөмрөгийн бүрдүүлэлт, бүртгэл, каталогжуулалт, хадгалалт, хамгаалалт, сэргээн засварлалт, цахимжуулалт болон үйлчилгээний чиглэлээр үндэсний стандарт, дүрэм, журам, аргачлал боловсруулахад мэргэжлийн дэмжлэг үзүүлэх, нийтийн бусад номын сантай хамтран ажиллах;
6.2.18. нийтийн болон орон нутгийн номын санг эрдэм шинжилгээ, судалгаа, мэргэжил, арга зүйн дэмжлэгээр хангах, номын сан хоорондын хамтын ажиллагаа, мэдээлэл солилцоо, нөөцийн хамтын ашиглалтыг зохицуулах;
6.2.19. номын сан, мэдээллийн ажилтны мэргэжил дээшлүүлэх, давтан сургах үйл ажиллагааг эрх бүхий боловсролын болон мэргэжлийн байгууллагатай хамтран зохион байгуулах;
6.2.20. номын сан хоорондын ном солилцоо, баримт хүргэлт, лавлагаа, мэдээллийн хамтарсан үйлчилгээг үндэсний хэмжээнд зохион байгуулах;
6.2.21. унших соёлыг хөхиүлэн дэмжих үндэсний хэмжээний хөтөлбөр, төсөл, арга хэмжээг хэрэгжүүлэх;
6.2.22. үндэсний ой санамж, баримтат өв, монголын түүх, хэл, бичиг үсэг, соёл, шинжлэх ухааны ололтыг үзэсгэлэн, хэвлэл, цахим үйлчилгээ, боловсролын хөтөлбөр болон бусад хэлбэрээр сурталчлан таниулах;
6.2.23. гадаад улсын үндэсний номын сан, олон улсын болон бүс нутгийн номын сан, мэдээлэл, баримтат өвийн байгууллагатай хамтран ажиллах, бүтээл, мэдээлэл, мэргэжлийн туршлага солилцох, үндэсний соёл, соёлын өвийг сурталчлах хамтарсан төсөл, хөтөлбөр хэрэгжүүлэх;
6.2.24. номын сангийн салбарын хөгжил, үндэсний сан хөмрөг, баримтат өвийн хадгалалт, хамгаалалт, хүртээмж болон цахим шилжилтийн асуудлаар төрийн байгууллагад судалгаа, мэдээлэл, мэргэжлийн санал, зөвлөмж хүргүүлэх;
6.2.25. хуульд заасан бусад чиг үүрэг.
6.3. Үндэсний номын сан энэ хуулийн 6.2-т заасан чиг үүргийг хэрэгжүүлэхдээ сан хөмрөгийн бүрдүүлэлт, сонголт, ангилал, тодорхойлолт, хадгалалт, хамгаалалт, судалгаа болон ашиглалтын талаарх мэргэжлийн шийдвэрийг хууль тогтоомж, мэргэжлийн ёс зүй, стандарт, судалгаа, нотолгоонд үндэслэн бие даан гаргана.
6.4. Үндэсний номын сангийн үндсэн чиг үүргийг гэрээний үндсэн дээр бусдад бүхэлд нь шилжүүлэхийг хориглоно. Тодорхой ажил, үйлчилгээг бусдаар гүйцэтгүүлсэн нь тухайн чиг үүргийн хэрэгжилт, сан хөмрөгийн аюулгүй байдал, мэдээллийн нууцлалын төлөө хүлээх Үндэсний номын сангийн хариуцлагыг шилжүүлэх үндэслэл болохгүй.
