341.1. Коронавируст халдвар /КОВИД-19/-т цар тахлын эдийн засагт үзүүлж байгаа сөрөг нөлөөллийг бууруулж, эдийн засгийн суурийг тэлэх, төрийн бүтээмжийг нэмэгдүүлэх зорилгоор Улсын Их Хурлаас баталсан хөгжлийн төслийн жагсаалтад багтсан төсөл, арга хэмжээний гүйцэтгэгчийг хэлэлцээ хийж гэрээ байгуулах аргаар сонгож болно.
341.2. Захиалагч хэлэлцээ хийж гэрээ байгуулах тухай зарлалыг төсөл, арга хэмжээний ерөнхий мэдээллийн хамт худалдан авах ажиллагааны цахим системд нийтэлж, хэлэлцээнд оролцох сонирхлоо илэрхийлэх хугацааг ажлын таван өдөр байхаар, хэлэлцээ эхлүүлэх хугацааг сонирхлоо илэрхийлэх эцсийн хугацаанаас хойш ажлын гурваас доошгүй өдөр байхаар тус тус заана.
341.3. Захиалагч энэ хуулийн 20.2, 20.3-т заасан хэлбэрээр хэлэлцээнд оролцох баталгааны хувь хэмжээг зарлалд тусгана.
341.4. Захиалагчаас төслийг гүйцэтгэх хүчин чадал, нөөц бололцоотой гэж үзсэн гадаад, дотоодын этгээдэд зарлалыг худалдан авах ажиллагааны цахим системд зарлал нийтэлсэн өдөрт багтаан хүргүүлж болно.
341.5. Энэ хуулийн 341.4-т заасны дагуу зарлал хүргүүлсэн этгээдийн нэрийг худалдан авах ажиллагааны цахим системд зарлал оруулснаас хойш ажлын нэг өдрийн дотор мэдээлнэ.
341.6. Захиалагч хэлэлцээг зарлалд заасан хугацаанд хэлэлцээнд оролцох сонирхлоо илэрхийлж, хэлэлцээ эхлэхээс өмнө энэ хуулийн 341.3-т заасанд нийцэх баталгаа ирүүлсэн бүх этгээдтэй нэгэн зэрэг хийнэ.
341.7. Захиалагч хэлэлцээ хийхэд баримтлахаар тогтоосон дэгийг оролцогчид танилцуулж, хэлэлцээний тэмдэглэл хөтөлнө.
341.8. Хэлэлцээнд оролцох сонирхол илэрхийлсэн этгээд хүрэлцэн ирээгүй эсхүл хэлэлцээнд оролцох баталгаа ирүүлээгүй нь бусад этгээдтэй хийх хэлэлцээг хойшлуулах үндэслэл болохгүй.
341.9. Хэлэлцээгээр техникийн тодорхойлолт, санхүүжилтийн болон гэрээний нөхцөл зэрэг төсөл, арга хэмжээг амжилттай хэрэгжүүлэхэд шаардлагатай мэдээллийг солилцоно.
341.10. Захиалагч хэлэлцээний явцад цугларсан мэдээлэлд үндэслэн гэрээний үүрэг гүйцэтгэх чадавхтай этгээдийн чадавх, боломжийг тодорхойлохдоо энэ хуулийн 14.1-д заасан нэг ба түүнээс дээш ерөнхий нөхцөлийн шаардлагыг хэрэглэхгүй байхаар тендерийн баримт бичигт зааж болно.
341.11. Захиалагч хэлэлцээний үндсэн дээр баталсан тендерийн баримт бичиг, тендерийн урилгыг худалдан авах ажиллагааны цахим системд нийтэлж, тендер хүлээн авах эцсийн хугацааг ажлын долоогоос доошгүй өдөр байхаар заана.
341.12. Хэлэлцээний явцад авсан мэдээлэлд үндэслэн тендерийн баримт бичгийг боловсруулсан нь энэ хуулийн 11.2-т заасныг зөрчсөн гэж үзэх үндэслэл болохгүй.
341.13. Хэлэлцээнд оролцсон этгээд тендер ирүүлэх эрхтэй байна.
341.14. Тендер нээснээс хойш захиалагч тендерт оролцогчоос тодруулга авах эрхгүй байна.
341.15. Тендерийг энэ хуулийн 27 дугаар зүйлд заасны дагуу хянан үзэж, шаардлагад нийцсэн тендерийг хуулийн 28 дугаар зүйлд заасны дагуу үнэлж, хуулийн 29 дүгээр зүйлд зааснаар гэрээ байгуулах эрх олгоно.”