27.1. Хуульчийн мэргэжлийн үйл ажиллагаанд дараах үйл ажиллагааг хориглоно:
27.1.1. хууль, мэргэжлийн ёс зүйн дүрмийг зөрчих, зөрчихөөр завдах, мэдсээр байж бусдыг тийм үйлдэл хийхэд туслах, хатгах;
27.1.2. хуульчийн нэр хүндэд сөргөөр нөлөөлөх гэмт хэрэг, зөрчил үйлдэх;
27.1.3. хуульчийн мэргэжлийн үйл ажиллагааг хууль бус аргаар эрхлэх;
27.1.4. төрийн байгууллага, албан тушаалтан, бусад хуульчдын мэргэжлийн үйл ажиллагаа, тэдгээрээс шийдвэр гаргах үйл ажиллагаанд хууль бусаар нөлөөлөх;
27.1.5. хуульчийн мэргэжлийн үүргээ гүйцэтгэх явцад олж мэдсэн төрийн болон албаны, байгууллага, хувь хүний нууц, хүний хувийн мэдээллийг хууль бусаар задруулах, уг мэдээллийг өөрийн болон гуравдагч этгээдийн ашиг сонирхлын тулд ашиглах;
27.1.6. хууль тогтоомж болон үйл баримтын талаар худал мэдээлэл өгөх;
27.1.7. хувийн ашиг сонирхлын үүднээс өөрийн хуульчийн мэргэжлийн үйл ажиллагааны хүрээнд хамаарахгүй хэрэг маргааны материал, баримт бичиг, мэдээ, мэдээлэлтэй танилцах, тэдгээрийг эрж хайх;
27.1.8. хуульчийн мэргэжлийн үйл ажиллагааны үр дүнгийн талаар амлалт өгөх;
27.1.9. хэрэг, маргаан хянан шийдвэрлэх ажиллагааны явцад худал мэдүүлэг, хуурамч баримт сэлт, мэдээ, мэдээлэл гаргаж өгөх, тэдгээрийг мэдсээр байж хуульчийн мэргэжлийн үйл ажиллагаанд ашиглах, бусдаар худал тайлбар, мэдүүлэг нотлох баримт, баримт сэлт, мэдээ, мэдээлэл гаргаж өгөхийг зөвлөх, шаардах, уг үйлдэлд нь зөвшөөрөл олгох, туслах, дэмжих, зохион байгуулах;
27.1.10. хуульчийн мэргэжлийн үйл ажиллагаанд нь хамаарах этгээдийн эд хөрөнгө, эд хөрөнгийн эрхийг өөрийн болон бусад этгээдийн нэрээр худалдан авах, эсхүл өөр бусад аргаар олж авах, эзэмших;
27.1.11. хуульд заасан эрх хэмжээгээ хэтрүүлэх, хувийн ашиг сонирхлын тулд урвуулан ашиглах, бусдыг аливаа хэлбэр, үндэслэлээр ялгаварлан гадуурхах, бусдад хуульд нийцээгүй үүрэг, даалгавар өгөх, биелүүлэхийг шаардах;
27.1.12. шүүх эрх мэдлийг хэрэгжүүлэгч байгууллагын хэвийн үйл ажиллагааг алдагдуулахад чиглэсэн аливаа арга хэмжээ төлөвлөх, зохион байгуулах, тэдгээрт оролцох;
27.1.13. хуульд заасан эрх хэмжээгээ шашны ухуулга, сурталчилгаанд ашиглах;
27.1.14. хууль тогтоомжид заасан ашиг сонирхлын зөрчил бүхий, эсхүл татгалзан гарах үндэслэл бүхий нөхцөл байдалд хуульчийн мэргэжлийн үйл ажиллагаа эрхлэх;
27.1.15. бусдын хууль бус хүсэлт, үүрэг, даалгавар, шаардлагыг биелүүлэх, биелүүлэхээр зөвшөөрөх;
27.1.16. шүүхээр эцэслэн шийдвэрлэгдээгүй хэргийн талаар өөрийн байр сууриа хэвлэл, мэдээллийн хэрэгсэл, олон нийтийн сүлжээнд нийтлэх;
27.1.17. хэрэг, маргааны талаар худал ташаа мэдээллийг хэвлэл, мэдээллийн хэрэгсэл, олон нийтийн сүлжээнд тараах, мэдээлэх.
27.2. Энэ хуульд зааснаас бусад хуульчийн мэргэжлийн үйл ажиллагаанд хориглох зүйлийг хууль, мэргэжлийн ёс зүйн дүрмээр тогтооно.
27.3. Шүүгч, прокурор, нотариатч, өмгөөлөгчийн ёс зүйтэй холбоотой асуудлыг Монгол Улсын шүүхийн тухай, Прокурорын тухай, Төрийн албаны тухай, Нотариатын тухай, Өмгөөллийн тухай хуульд заасны дагуу тус тус нарийвчлан зохицуулна.
