38 дугаар зүйл.Иргэний нийгмийн хөгжлийг дэмжих зөвлөл.
38.1.Иргэний нийгмийн хөгжлийг дэмжих зөвлөл /цаашид “Зөвлөл” гэх/ нь орон тооны бус 9 гишүүнтэй байх бөгөөд ажлын албатай байна.
38.2.Зөвлөлийн гишүүний бүрэн эрхийн хугацаа зөвлөлийн гишүүнээр батламжилснаас хойш 3 жил байна.
38.3.Зөвлөлийн гишүүн болох хүсэлтэй иргэн нээлттэй сонгон шалгаруулалтад оролцох хүсэлт ирүүлэх талаар олон нийтийн мэдээллийн хэрэгслээр нийтэд мэдээлснээс хойш 30 хоногийн дотор нэр дэвших тухай хүсэлтээ Иргэний нийгмийн хөгжлийг дэмжих зөвлөлийн ажлын алба /цаашид “ажлын алба” гэх/-д ирүүлнэ.
38.4.Нэр дэвших хүсэлт гаргагч нь дараах салбарын зөвхөн аль нэг салбарт хүсэлтээ гаргана:
38.4.1.хүний эрх, ардчилал, сайн засаглал;
38.4.2.нийгмийн хамгаалал, халамж, үйлчилгээ;
38.4.3.боловсрол, соёл, шинжлэх ухаан;
38.4.4.эрүүл мэнд, сонирхогчдын спорт;
38.4.5.байгаль орчныг хамгаалах;
38.4.6.гамшгаас хамгаалах, хүмүүнлэгийн үйл ажиллагаа;
38.4.7.хүнс хөдөө аж ахуйн;
38.4.8.бусад.
38.5.Хэрэв нэр дэвших хүсэлтийг салбар тус бүрд 3, эсхүл түүнээс доош иргэн гаргасан тохиолдолд бүртгэх хугацааг дахин 10 хоногоор сунгаж болно.
38.6.Зөвлөлийн гишүүний бүрэн эрхийн хугацаа дуусахаас 60-аас доошгүй хоногийн өмнө ажлын алба зөвлөлийн гишүүнд нэр дэвшигчийг сонгон шалгаруулах тухай олон нийтийн хэвлэл, мэдээллийн хэрэгслээр мэдээлж, хүсэлтийг хүлээн авна.
38.7.Ажлын алба зөвлөлийн гишүүний нээлттэй сонгон шалгаруулалтыг явуулах ажлын хэсгийг байгуулна. Ажлын хэсгийн бүрэлдэхүүн төрийн болон иргэний нийгмийн байгууллагын төлөөллөөс бүрдсэн 11 гишүүнтэй байна.
38.8.Энэ хуулийн 38.6-д заасан ажлын хэсэг зөвлөлийн гишүүний орон тоонд нэр дэвших хүсэлт ирүүлэх хугацаа дууссаны дараа 15 хоногийн дотор нээлттэй сонгон шалгаруулалтыг салбар тус бүрээр явуулна.
38.9.Ажлын хэсэгт нээлттэй сонгон шалгаруулалтад салбар тус бүрд хамгийн өндөр оноо авсан 1 иргэн, нийт 9 иргэнийг Засгийн газрын хуралдаанд танилцуулж, Ерөнхий сайд батламжилна.
38.10.Зөвлөлийн гишүүний бүрэн эрхийн хугацаа дуусгавар болохоос өмнө огцорсон, нас барсан, өөрийн хүсэлтээр чөлөөлөгдсөн тохиолдолд ажлын алба 60 хоногийн дотор зөвлөлийн гишүүний сул орон тоонд сонгон шалгаруулалтыг энэ хуульд заасан журмын дагуу явуулна.
38.11.Энэ хуулийн 38.3-т заасан нэр дэвшигч нь улс төрийн нам, хөдөлгөөн, шашны байгууллага болон аль нэг ашгийн төлөө хуулийн этгээдийг төлөөлдөг, эсхүл эдгээр байгууллагын үүсгэн байгуулагч, удирдах албан тушаалтан байхыг хориглоно.
38.12.Зөвлөлийн гишүүнд тавигдах шаардлага, нэр дэвшүүлэх, сонгон шалгаруулалт явуулах, чөлөөлөх, урамшуулал олгох нарийвчилсан журмыг Засгийн газар батална.
38.13.Зөвлөлийн даргыг гишүүд дундаасаа нууцаар сонгоно.
38.14.Зөвлөлийн гишүүн нь нийтийн албан тушаалтны нэгэн адил үүрэг хүлээнэ.
38.15.Зөвлөлийн гишүүдэд ажлын оролцоог харгалзан урамшуулал олгож болох бөгөөд урамшууллыг ажлын албаны төсөвт тусгана.
39 дүгээр зүйл.Иргэний нийгмийн хөгжлийг дэмжих зөвлөлийн бүрэн эрх.
39.1.Зөвлөл нь дараах бүрэн эрхийг хэрэгжүүлнэ:
39.1.1.Монгол Улсын иргэний нийгэм, ашгийн төлөө бус хуулийн этгээдийн чадавхыг дэмжих, дотоод засаглал, ёс зүйн жишгийг тогтоож хөгжүүлэх;
39.1.2.төрийн бодлого, шийдвэрийн төсөл боловсруулах, батлагдсан бодлого, шийдвэрийн хэрэгжилтийг хянахад иргэд, ашгийн төлөө бус хуулийн этгээдийн оролцоог хангах талаар төрийн байгууллагуудад мэргэжил, арга зүйн зөвлөгөө өгөх, аргачлалаар хангах;
39.1.3.ашгийн төлөө бус хуулийн этгээдийн хөгжил, хамтын ажиллагаатай холбоотой нийтлэг асуудлаар төр, олон улсын болон гадаад улсын байгууллагуудтай харилцах;
39.1.4.бүртгэлийн болон статистикийн байгууллагуудтай хамтран ашгийн төлөө бус хуулийн этгээдийн талаарх мэдээлэлд дүн шинжилгээ хийх;
39.1.5.ашгийн төлөө бус хуулийн этгээдийн нийтэд тустай үйл ажиллагааны болон сайн дурын тайлан авах, үйл ажиллагааны үр нөлөөг нэгтгэн дүгнэх, зөвлөмж гаргах;
39.1.6.ашгийн төлөө бус хуулийн этгээдийн мэдлэг, туршлага солилцох болон бусад хэлбэрийн хамтын ажиллагааг дэмжих, мэдээллээр хангах, соён гэгээрүүлэх арга хэмжээг авах;
39.1.7.Монгол Улсын иргэний нийгэм, ашгийн төлөө бус хуулийн этгээдийн мэдээллийн санг үүсгэх, хөтлөх, олон нийтэд мэдээлэх;
39.1.8.ашгийн төлөө бус хуулийн этгээдийн мөнгө угаах, терроризмыг санхүүжүүлэх үйл ажиллагаанд өртөх магадлал, эмзэг байдлын талаарх судалгааг хийх болон Мөнгө угаах болон терроризмыг санхүүжүүлэхтэй тэмцэх тухай хуулийн 18.1.8-д заасан үндэсний эрсдэлийн үнэлгээг 2 жил тутамд хийх, эрсдэлийг хянах, бууруулахад эрх бүхий байгууллагад дэмжлэг үзүүлэх;
39.1.9.иргэний нийгмийн байгууллагуудыг үр дүнтэй ажиллахад таатай орчныг бүрдүүлэхэд хууль эрх зүйн, санхүүжилтийн орчны үнэлгээг хийж, дүгнэлт гаргана.
39.2.Зөвлөлөөс үйл ажиллагаагаа идэвхтэй явуулж байгаа ашгийн төлөө бус хуулийн этгээдийн жагсаалтыг гаргаж, олон нийтэд нээлттэй мэдээлнэ.
39.3.Энэ хуулийн 39.1.7-д заасан мэдээллийн сан үүсгэх, хөтлөх, түүний мэдээллийг ашиглах, сангаас мэдээлэл авах журмыг зөвлөл батална.
39.4.Зөвлөл нь жилийн үйл ажиллагааны тайлангаа цахим хуудсандаа нээлттэй байршуулж, дараа жилийн эхний улиралд багтаан Засгийн газарт танилцуулна.
Тайлбар: Энэ хуульд заасан “ашгийн төлөө бус хуулийн этгээд” гэж нийгмийн болон өөрсдийн ашиг сонирхол, үнэт зүйл, үзэл бодлын үүднээс төрийн байгууллага /хууль тогтоох, гүйцэтгэх, шүүх эрх мэдлийг хэрэгжүүлэх байгууллага/, нийтийн эрх зүйн хуулийн этгээдээс бусад хуулийн этгээд, иргэдээс сайн дурын үндсэн дээр байгуулсан төрөөс хараат бус өөрийгөө удирдах зарчмаар үйл ажиллагаагаа явуулдаг ашиг хуваарилдаггүй хуулийн этгээд/холбоо, сан/-ийг ойлгоно.
40 дүгээр зүйл.Иргэний нийгмийн хөгжлийг дэмжих данс.
40.1.Зөвлөл нь иргэний нийгмийн нийтлэг хөгжил, чадавхыг бэхжүүлэх, нийтэд тустай үйл ажиллагааг дэмжих, сурталчлах, иргэний нийгмийн талаарх судалгаа шинжилгээ хийх, сургалт хэлэлцүүлэг зохион байгуулах үйл ажиллагааг санхүүжүүлэх зорилго бүхий Иргэний нийгмийн хөгжлийг дэмжих мөнгөн хөрөнгийн данстай (цаашид “данс” гэх) байна.
40.2.Энэ хуулийн 40.1-д заасан дансны санхүүжилт нь дараах эх үүсвэрээс бүрдэнэ
40.2.1.гадаад улс, олон улсын байгууллага, Монгол Улсын болон гадаад улсын иргэн, аж ахуйн нэгж, байгууллага, ашгийн төлөө бус хуулийн этгээдийн хандив, тусламж;
40.2.2.дансан дахь мөнгөн хөрөнгийн чөлөөт үлдэгдлийг банкинд хадгалуулсны хүү;
40.2.3.хүлээн авсан өв;
40.2.4.бусад эх үүсвэр.
40.3.Энэ хуулийн 40.1-д заасан дансанд зориулж улсын болон орон нутгийн төсвөөс дэмжлэг үзүүлж болно.
40.4.Дансны хөрөнгийг энэ хуулийн 40.1-д зааснаас бусад зориулалтаар зарцуулахыг хориглоно.
40.5.Энэ хуулийн 40.1-д заасан дансанд дахь хөрөнгийг бүрдүүлэх, зарцуулах, тайлагнах, түүнд хяналт тавих журмыг Засгийн газар батална.
40.6.Энэ хуулийн 40.1-д заасан дансан дахь хөрөнгийн бүрдүүлэлт, зарцуулалтын тайланг улирал тутам гаргаж, зөвлөлийн цахим хуудсаар олон нийтэд нээлттэй мэдээлнэ.
НАЙМДУГААР БҮЛЭГ БУСАД ЗОХИЦУУЛАЛТ.
41 дүгээр зүйл.Шилжилтийн үеийн зохицуулалт.
41.1.Холбоо нь энэ хуулийг дагаж мөрдсөнөөс хойш 2 жилийн хугацаанд багтаан улсын бүртгэлд шинэчлэн бүртгүүлнэ.
41.2.Энэ хуулийн 13.1-13.8-д заасан зохицуулалтыг энэ хуулийг дагаж мөрдсөнөөс хойш 1 жилийн дараа дагаж мөрдөнө.
41.3.Энэ хуулийн 41.1-д заасан хугацаанд улсын бүртгэлд шинэчлэн бүртгүүлэх үүргээ биелүүлээгүй нь тухайн холбоог улсын бүртгэлээс хасах үндэслэл болно.
42 дугаар зүйл.Хууль зөрчигчид хүлээлгэх хариуцлага.
42.1.Энэ хуулийг зөрчсөн албан тушаалтны үйлдэл нь гэмт хэргийн шинжгүй бол Төрийн албаны тухай хуульд заасан хариуцлага хүлээлгэнэ.
42.2.Энэ хуулийг зөрчсөн хүн, хуулийн этгээдэд Эрүүгийн хууль, эсхүл Зөрчлийн тухай хуульд заасан хариуцлага хүлээлгэнэ.
