1/6 дугаар зүйлийн 6.12 дахь хэсэг:
“6.12.Улсын Их Хурлын дарга энэ хуулийн 26.1-д заасан Засгийн газрын гишүүнээр томилох тухай асуудал, 103.1-д заасан Засгийн газрын гишүүнийг чөлөөлөх, огцруулах, түүнтэй холбогдуулан шинээр томилох асуудлын талаарх Ерөнхий сайдын танилцуулгыг хүлээн авснаас хойш уг асуудлыг ажлын 5 өдрийн дотор чуулганы нэгдсэн хуралдаанд танилцуулсан байхаар товыг тогтооно.”
2/39 дүгээр зүйлийн 39.23-39.28 дахь хэсэг:
“39.23.Гишүүн, нам, эвслийн бүлгийн болон энэ хуулийн 39.9-д заасан ажлын хэсгийн гаргасан зарчмын зөрүүтэй санал дэмжигдээгүй бол тухайн санал гаргасан гишүүн, хэрэв хэд хэдэн гишүүн хамтран санал гаргасан бол санал гаргасан гишүүдийн олонх, нам, эвслийн бүлэг, ажлын хэсэг санал гаргасан бол нам, эвслийн бүлгийг төлөөлөх эрх бүхий гишүүн, ажлын хэсгийн ахлагч дэмжигдээгүй зарчмын зөрүүтэй саналыг нэгдсэн хуралдаанд танилцуулж санал хураалгах хүсэлт гаргана.
39.24.Энэ хуулийн 39.23-т заасны дагуу хүсэлт гаргаагүй дэмжигдээгүй саналыг нэгдсэн хуралдаанд танилцуулж санал хураалгахгүй.
39.25.Хуулийн төслийг энэ хуулийн 39.3, 39.5-д заасны дагуу Байнгын хороогоор хэлэлцэхэд гаргасан зарчмын зөрүүтэй санал дэмжигдээгүй бол тухайн санал гаргасан гишүүн, хэрэв хэд хэдэн гишүүн хамтран санал гаргасан бол санал гаргасан гишүүдийн олонх, нам, эвслийн бүлэг, ажлын хэсэг санал гаргасан бол нам, эвслийн бүлгийг төлөөлөх эрх бүхий гишүүн, ажлын хэсгийн ахлагч уг саналаа нэгдсэн хуралдаанаар хэлэлцүүлж, хураалгах хүсэлтээ тухайн Байнгын хорооны хуралдаанд гаргана.
39.26.Энэ хуулийн 39.3, 39.5-д заасан санал, дүгнэлтийн хамт гаргасан зарчмын зөрүүтэй саналаар холбогдох Байнгын хороо санал хураалт явуулж, дэмжсэн, дэмжээгүй саналыг аль алиныг нь нэгдсэн хуралдаанаар хэлэлцүүлж санал хураалгана.
39.27.Энэ хуулийн 39.23, 39.25-д заасны дагуу Байнгын хорооны хуралдаанаар дэмжигдээгүй саналыг нэгдсэн чуулганаар хэлэлцүүлэн санал хураалгах хүсэлтийг санал гаргасан гишүүн, нам, эвслийн бүлэг тухайн байнгын хорооны хуралдааны тэмдэглэлд тусгуулна.
39.28.Зарчмын зөрүүтэй санал гаргасан гишүүн, нам, эвслийн бүлэг өөрийн гаргасан зарчмын зөрүүтэй санал дэмжигдсэн эсэхийг мэдээгүй нь тухайн саналыг нэгдсэн хуралдаанаар хэлэлцүүлж санал хураалгах үндэслэл болохгүй.”
