6.1. Энэ хуульд заасан тайлан, мэдээллийг цахимаар хүлээн авах, бүртгэх, хадгалах, боловсруулах, шалгах, нийтлэх, мэдээлэл солилцох зориулалт бүхий мэдээллийн нэгдсэн портал (цаашид “нэгдсэн портал” гэх) ажиллуулна.
6.2. Нэгдсэн портал Нийтийн мэдээллийн ил тод байдлын тухай хуулийн 18.6-д заасан шаардлагад нийцсэн, 27.10-т заасан нэгдсэн, ангилал, код, тайлбартай байна.
6.3. Байгалийн нөөц ашиглалтын мэдээллийн жагсаалтыг Засгийн газар батална.
6.4. Нэгдсэн порталд бүртгэх мэдээлэл тоон мэдээлэл, өгөгдөл, дуу авиа, дүрс бичлэг, зураг, газрын зураг, кадастрын зураг, график, бичгийн хэлбэртэй байна.
6.5. Нэгдсэн порталд байрших газрын зураг, кадастрын зурган мэдээлэл Засгийн газраас тодорхойлсон солбицол, өндрийн тогтолцоонд нийцсэн байна.
6.6. Үндэсний зөвлөл нэгдсэн порталын үйл ажиллагааг хууль тогтоомжид нийцүүлэн хариуцна.
6.7. Нэгдсэн портал бусад хуульд заасан байгалийн нөөцийн, зөвшөөрлийн, шилэн дансны, хуулийн этгээдийн улсын бүртгэлийн, татварын зэрэг холбогдох мэдээллийн сантай холбогдсон, мэдээлэл солилцох боломжтой байна.
6.8. Нэгдсэн порталд цахим хэлбэрээр хүргүүлсэн мэдээлэл, тайлан цахим гарын үсэг, эсхүл хуульд заасан бусад баталгаажуулах арга, хэрэгслээр баталгаажсан байна.
6.9. Байгалийн нөөцийн ашиглалттай холбоотой бусад хуульд заасан тайлан, мэдээ, мэдээллийг нэгдсэн порталаар дамжуулан цахимаар хүргүүлсэн бол тухайн мэдээллийг холбогдох төрийн байгууллагад хүргүүлсэнд тооцно.
6.10. Нэгдсэн порталд бүртгэгдээгүй, эсхүл баталгаажаагүй мэдээллийг байгалийн нөөц ашиглалттай холбоотой зөвшөөрөл олгох, сунгах, түдгэлзүүлэх, хүчингүй болгох, төлөвлөгөө батлах, хяналт шалгалт хийх, тайлан боловсруулах үндэслэл болгохгүй.
6.11. Нэгдсэн порталын мэдээллийг Архивын тухай хуульд заасан хугацаагаар хадгална.
6.12. Нэгдсэн порталд мэдээлэл нийлүүлэх, хадгалах, ашиглах, ашиглалтад хяналт тавих журмыг Үндэсний зөвлөл батална.
6.13. Үндэсний зөвлөлийн ажлын алба (цаашид “Ажлын алба” гэх) нэгдсэн порталд илгээсэн мэдээллийн хэлбэр, хугацаа, бүрдлийг шалгана.
6.14. Ажлын алба мэдээлэл дутуу, алдаатай, зөрүүтэй бол мэдээлэл нийлүүлэгчид буцааж, засварлах шаардлага хүргүүлнэ.
6.15. Мэдээлэл нийлүүлэгч энэ хуулийн 6.15-т заасан шаардлагыг хүлээн авснаас хойш ажлын 5 өдрийн дотор засварласан мэдээллийг дахин илгээнэ.
6.16. Энэ хууль болон холбогдох бусад хуульд заасан тайлан, мэдээллийг мэдээлэл нийлүүлэгч холбогдох мэдээллийн сан, нэгдсэн портал, эсхүл салбарын эрх бүхий байгууллагад цахимаар хүргүүлсэн бол төрийн байгууллага уг мэдээллийг дахин шаардахгүй бөгөөд нийтийн мэдээллийн дэд бүтэц, мэдээлэл солилцооны системээр дамжуулан авч ашиглана.
6.17. Үндэсний зөвлөл нэгдсэн порталаар тайлан, мэдээллийг нэг цонхоор хүлээн авах, харилцан солилцох, дахин шаардахгүй байх техникийн боломжтой байна.
