1 дүгээр зүйл. Эрүүгийн хуулийн 21.9 дүгээр зүйлд дараах тайлбарыг нэмсүгэй:
“Тайлбар: -тухайн хэргийн өмгөөлөгч, шүүгч, шүүгчээс эрх олгосон шүүхийн ажилтанд энэ зүйлийн 1 дэх хэсэг хамаарахгүй.
-Энэ зүйлийн 2 дахь хэсэгт дурдсан мөрдөн шалгах ажиллагааны нууцалсан баримт, мэдээлэл гэдэгт шүүхэд хэргийг хэлэлцүүлэхээр танилцуулах ажиллагаа буюу шүүхийн урьдчилсан хэлэлцүүлгээс өмнөх шатанд хууль сахиулах, гэмт хэрэгтэй тэмцэх, хэрэг хянан шийдвэрлэх ажиллагааны явцад нууцалсан гэрч, нууц мөрдөн шалгах ажиллагаа явуулж цуглуулсан нотлох баримтыг ойлгоно.”
2 дугаар зүйл. Эрүүгийн хуулийн 21.9 дүгээр зүйлийн 2 дахь хэсгийн "мөрдөн шалгах" гэсний өмнө "хууль сахиулагч", "алба хаагч" гэсний өмнө "алба тушаалтан," гэж нэмсүгэй.
3 дугаар зүйл. Эрүүгийн хуулийн 21.9 дүгээр зүйлийн 3 дэх хэсгийг доор дурдсанаар өөрчлөн найруулсугай:
“3.Мөрдөн шалгах ажиллагааны нууцалсан баримт, мэдээллийг олж мэдсэн хүн баримт, мэдээллийг задруулж нууцалсан гэрчийг илчилсэн, эсхүл шүүгч, прокурор, хууль сахиулагч, мөн мөрдөн шалгах ажиллагааны нууцалсан баримт, мэдээллийг албаны үүргийн дагуу олж мэдсэн алба тушаалтан, алба хаагч, ажилтан тус мэдээллийг задруулж, хэрэг хянан шийдвэрлэх ажиллагаанд саад учруулсан бол нийтийн албанд ажиллах эрхийг гурван жилээс таван жил хүртэл хугацаагаар хасаж нэг жилээс таван жил хүртэл хугацаагаар зорчих эрхийг хязгаарлах, эсхүл нэг жилээс таван жил хүртэл хугацаагаар хорих ял шийтгэнэ.”
4 дүгээр зүйл. Эрүүгийн хуулийн 21.9 дүгээр зүйлийн 1 дэх хэсгийг хүчингүй болгосугай.
