1.Дараах арга хэмжээг авч хэрэгжүүлэхийг Монгол Улсын Засгийн газар /Н.Учрал/-т даалгасугай:
1/"Алтанбулаг", "Замын-Үүд", "Цагааннуур" чөлөөт бүсийн үйл ажиллагааны өнөөгийн байдал, газар олголт, хөрөнгө оруулалтын гэрээний хэрэгжилт, дэд бүтцийн ашиглалтын түвшинд нэгдсэн үнэлгээ хийж, Чөлөөт бүсийн тухай хуулийн хэрэгжилтийн үр дагаварт үнэлгээ хийсэн тайлангийн хамт Улсын Их Хуралд хүргүүлэх;
2/улсын төсөв, гадаадын зээл, тусламжийн хөрөнгөөр барьж байгуулсан боловч бүрэн ашиглалтад ороогүй дэд бүтцийн барилга байгууламжийг ашиглалтад оруулах хугацаатай төлөвлөгөөг батлан хэрэгжүүлж, Чөлөөт бүсийн тухай хуулийн 24 дүгээр зүйлийн 24.3, 24.4-т заасан эх үүсвэрийн хүрээнд санхүүжилтийн талаар санал боловсруулах;
3/чөлөөт бүсийн газар ашиглуулах сонгон шалгаруулалт, дуудлага худалдааны ил тод байдлыг хангаж, ашиглагдахгүй байгаа газрын гэрээг дүгнэж, холбогдох арга хэмжээ авах;
4/Чөлөөт бүсийн тухай хуулийн 19.2-т заасан орлогын 20 хүртэл хувийг зарцуулах зохицуулалтын хэрэгжилтийг хангаж, зарцуулалтын тайланг Улсын Их Хуралд танилцуулах;
5/Улсын Их Хурлын 1995 оны 87 дугаар тогтоолоор баталсан "Монгол Улсад эдийн засгийн чөлөөт бүс байгуулах үзэл баримтлал"-ыг Монгол Улсын урт хугацааны хөгжлийн бодлогын баримт бичигт нийцүүлэн шинэчлэн боловсруулж, Улсын Их Хуралд өргөн мэдүүлэх.
