131.1. Замын хөдөлгөөний аюулгүй байдлыг хангах талаар нийтийн хэрэглээний цахилгаан дугуй, цахилгаан скүүтерийн үйлчилгээ үзүүлэгч хуулийн этгээд нь дараах эрх эдэлнэ:
131.1.1. үйлчилгээний нөхцөл, үнэ тарифаа өөрөө тогтоох;
131.1.2. холбогдох эрх бүхий байгууллага, албан тушаалтнаас замын хөдөлгөөнд хязгаарлалт буюу хориглолт тогтоосон шалтгаан, нөхцөл, хөдөлгөөний аюулгүй байдлыг хангахад чиглэсэн ажлын талаар мэдээлэл авах;
131.1.3. замын хөдөлгөөний аюулгүй байдлыг хангах талаар төрийн болон төрийн бус байгууллага, иргэдтэй хамтран ажиллах.
131.2. Замын хөдөлгөөний аюулгүй байдлыг хангах талаар нийтийн хэрэглээний цахилгаан дугуй, цахилгаан скүүтерийн үйлчилгээ үзүүлэгч хуулийн этгээд нь дараах үүргийг хүлээнэ:
131.2.1. энэ хуульд заасан техникийн ерөнхий шаардлага, зохих стандартад нийцсэн цахилгаан дугуй, цахилгаан скүүтерээр үйлчилгээ үзүүлэх;
131.2.2. өөрийн эзэмшлийн цахилгаан дугуй, цахилгаан скүүтерийг тогтоосон хугацаанд техникийн хяналтын үзлэгт хамруулах;
131.2.3. тухайн нутаг дэвсгэрт эрх бүхий этгээдээс тогтоосон явах чиглэл, зогсоолын байршилд цахилгаан дугуй, цахилгаан скүүтерийг байршуулах;
131.2.4. эрх бүхий этгээдээс зөвшөөрсөн зогсоолын байршлаас бусад нийтийн эзэмшлийн зам, гудамж, талбай, нийтийн амралт, зугаалга, биеийн тамирын зориулалттай газар, цэцэрлэгт хүрээлэн, оршуулгын газар, авто зогсоол, ногоон байгууламж, нийтийн зориулалттай орон сууцны байшингийн орчны газрын ногоон зүлэг, хүүхдийн тоглоомын талбай, эдгээртэй адилтгах газарт цахилгаан дугуй, цахилгаан скүүтер байршуулахгүй байх;
131.2.5. явган хүний зам, нийтийн амралт, зугаалга, биеийн тамирын зориулалттай газар, цэцэрлэгт хүрээлэн, нийтийн зориулалттай орон сууцны байшингийн орчны газар, хороолол, сургууль орчмын бүсэд цахилгаан дугуй, цахилгаан скүүтерийн техникийн дээд хурдыг цагт 5км-ээс ихгүй байхаар хязгаарлах (geofencing);
131.2.6. мэдээллийн эзний зөвшөөрлөөр хүний хувийн мэдээллийг цуглуулах, боловсруулах, ашиглах;
131.2.7. цахилгаан дугуй, цахилгаан скүүтерийн батарей, бусад аюултай хог хаягдлыг эрх бүхий байгууллагад эсхүл тогтоосон тусгай цэгт хүлээлгэн өгөх;
131.2.8. иргэдэд замын хөдөлгөөнд аюулгүй оролцохыг сурталчлах, цахилгаан дугуй, цахилгаан скүүтерийг зүй зохистой ашиглах хэрэглээний соёлыг эзэмшүүлэх;
131.2.9. замын хөдөлгөөний аюулгүй байдлыг хангах талаар эрх бүхий этгээдээс тавьсан хууль ёсны шаардлагыг биелүүлэх.
