ДУУ ЧИМЭЭНИЙ БОХИРДЛЫН ТУХАЙ

Боловсруулж байгаа хуулийн төслийн мэдээлэл

МОНГОЛ УЛСЫН ХУУЛЬ

2026 оны 10-р сарын 06 өдөр

Ulaanbaatar city

ДУУ ЧИМЭЭНИЙ БОХИРДЛЫН ТУХАЙ

НЭГДҮГЭЭР БҮЛЭГ
НИЙТЛЭГ ҮНДЭСЛЭЛ

1 дүгээр зүйл. Хуулийн зорилт

1.1. Энэ хуулийн зорилт нь хүний амь нас, эрүүл мэнд, хүрээлэн буй орчныг дуу чимээний сөрөг нөлөөллөөс хамгаалах, дуу чимээний бохирдлоос урьдчилан сэргийлэх, бууруулах, эх үүсвэрийг ангилах, бүртгэх, хүлцэх түвшин болон бүсчлэл тогтоох, хяналт-шинжилгээ, эрсдэлийн үнэлгээ, зураглал хийх, мэдээллийн сангийн тогтолцоо, хяналт болон оролцогчдын эрх, үүрэг, хариуцлагатай холбогдсон харилцааг зохицуулахад оршино.

0 0 0

2 дугаар зүйл. Дуу чимээний бохирдлын тухай хууль тогтоомж

0 0 0

2.1. Дуу чимээний бохирдлын хууль тогтоомж нь Монгол Улсын Үндсэн хууль , Агаарын тухай хууль , Барилгын тухай хууль , Байгаль орчныг хамгаалах тухай хууль , Байгаль орчинд нөлөөлөх байдлын үнэлгээний тухай хууль , Стандартчилал, техникийн зохицуулалт тохирлын үнэлгээний итгэмжлэлийн тухай хууль , Нийгмийн эрүүл мэндийн тусламж, үйлчилгээний тухай хууль , Орон сууцны тухай хууль , Хөдөлмөрийн аюулгүй байдал, эрүүл ахуйн тухай хууль , Эрүүл мэндийн тухай хууль , Эрүүл ахуйн тухай хууль , Зөрчлийн тухай хууль , энэ хууль болон эдгээр хуультай нийцүүлэн гаргасан хууль тогтоомжийн бусад актаас бүрдэнэ.

0 0 0

2.2. Монгол Улсын олон улсын гэрээнд энэ хуульд зааснаас өөрөөр заасан бол олон улсын гэрээний заалтыг дагаж мөрдөнө.

0 0 0

3 дугаар зүйл. Хуулийн үйлчлэх хүрээ

0 0 0

3.1. Энэ хууль нь Монгол Улсын иргэн, хуулийн этгээдэд үйлчилнэ.

0 0 0

3.2. Монгол Улсын нутаг дэвсгэрт байнга болон түр оршин сууж байгаа гадаадын иргэн, харьяалалгүй хүн энэ хуульд заасан эрх эдэлж, үүрэг хүлээнэ.

0 0 0

4 дүгээр зүйл. Хуулийн нэр томьёоны тодорхойлолт

0 0 0

4.1. Энэ хуульд хэрэглэсэн дараах нэр томьёог доор дурдсан утгаар ойлгоно:

0 0 0

4.1.1. “дуу чимээний бохирдол” гэж энэ хуулиар тогтоосон хүлцэх түвшнээс хэтэрсэн дуу чимээг;

0 0 0

4.1.2. “дуу чимээний эх үүсвэр” гэж дуу чимээ үүсгэж буй барилга байгууламж тоног төхөөрөмж, замын болон агаарын тээврийн хэрэгсэл, үйл ажиллагааг;

0 0 0

4.1.3. “дуу чимээний өртөлт” гэж хүн, ан амьтан, хүрээлэн буй орчин тодорхой байршил, цаг хугацаанд дуу чимээний нөлөөлөлд байхыг;

0 0 0

4.1.4. “хүлцэх түвшин” гэж эх үүсвэрийн төрөл, орчны зориулалт, бүсчлэл, цагийн үе, өртөлтийн хугацаа, хэмжилт, үнэлгээний үзүүлэлтээр ялгамжтай тогтоосон дуу чимээний түвшин, өртөлтийн зөвшөөрөгдөх дээд хязгаарыг;

0 0 0

4.1.5. “хяналт-шинжилгээ” гэж дуу чимээний түвшин, өртөлт, тэдгээрийн өөрчлөлтийг тогтмол ажиглах, хэмжих, бүртгэх, үнэлэх үйл ажиллагааг;

0 0 0

4.1.6. “дуу чимээний эрсдэлийн үнэлгээ” гэж дуу чимээний түвшин, үргэлжлэх хугацаа, давтамж, өртөх хүн ам, ан амьтан, орчны эмзэг байдлыг харгалзан сөрөг нөлөөллийн магадлал, үр дагаврыг үнэлэх үйл ажиллагааг;

0 0 0

4.1.7. “дуу чимээний зураглал” гэж газар зүйн байршилтай холбон дуу чимээний эх үүсвэр, тархалт, түвшин, өртөлтийг хэмжилт, тооцооллоор дүрсэлсэн мэдээллийг;

0 0 0

4.1.8. “чимээгүй бүс” гэж хүн амын амралт, суралцах, эмчлүүлэх, асруулах нөхцөлийг хамгаалах зорилгоор энэ хуулийн 9 дүгээр зүйлд заасны дагуу хил зааг, хамгаалалтын шаардлага тогтоосон бүсийг;

0 0 0

4.1.9. “өндөр эрсдэлтэй эх үүсвэр” гэж энэ хуулийн 21 дүгээр зүйлд заасан үнэлгээгээр хүний эрүүл мэнд, хүрээлэн буй орчинд үзүүлэх дуу чимээний эрсдэл өндөр гэж тогтоосон эх үүсвэрийг;

0 0 0

4.1.10. “дуу чимээг бууруулах үйл ажиллагааны төлөвлөгөө” гэж зураглал, хяналт-шинжилгээ, эрсдэлийн үнэлгээнд үндэслэн арга хэмжээ, хариуцах этгээд, хугацаа, санхүүжилт, үр дүнгийн шалгуур үзүүлэлтийг тогтоосон баримт бичгийг.

0 0 0

5 дугаар зүйл. Баримтлах зарчим

0 0 0

5.1. Дуу чимээний бохирдолд дараах зарчмыг баримтална:

0 0 0

5.1.1.хүний эрүүл, аюулгүй орчинд амьдрах эрхийг хамгаалах; 5.1.2.олон улсын жишиг, хөгжлийн чиг хандлагад нийцсэн байх; 5.1.3.шинжлэх ухааны судалгааны үр дүн, нотолгоонд суурилах; 5.1.4.төр, иргэн, аж ахуйн нэгж, байгууллагын хамтын үйл ажиллагаанд тулгуурлах; 5.1.5.эрх, хууль ёсны ашиг сонирхлыг хамгаалах.

0 0 0

ХОЁРДУГААР БҮЛЭГ
ДУУ ЧИМЭЭНИЙ ЭХ ҮҮСВЭР, ХҮЛЦЭХ ТҮВШИН БОЛОН БҮСЧЛЭЛ

6 дугаар зүйл. Дуу чимээний эх үүсвэрийн ангилал, бүртгэл

0 0 0

6.1. Дуу чимээний эх үүсвэрийг дараах байдлаар ангилна:

0 0 0

6.1.1.авто замын хөдөлгөөн, автотээврийн хэрэгслийн; 6.1.2.төмөр замын хөдөлгөөн, суурь бүтэц, ачилт, буулгалтын; 6.1.3.нисэх онгоц, нисэх буудлын үйл ажиллагааны; 6.1.4.үйлдвэрлэл, эрчим хүч, техник, тоног төхөөрөмжийн; 6.1.5.барилга угсралт, засвар, шинэчлэл, буулгалтын; 6.1.6.худалдаа, үйлчилгээ, соёл, үзвэр, олон нийтийн арга хэмжээний; 6.1.7.орон сууц, ахуйн үйл ажиллагааны; 6.1.8.бусад эх үүсвэрийн.

0 0 0

6.2. Эх үүсвэрийг хөдөлгөөнт, суурин, түр хугацааны, байнгын шинж болон дуу чимээний үргэлжлэх хугацаа, давтамжаар нь ялгана.

0 0 0

6.3. Аймаг, нийслэлийн Засаг дарга өндөр эрсдэлтэй эх үүсвэр, чимээгүй бүсэд нөлөөлөх эх үүсвэр болон зураглалд хамруулах авто зам, төмөр зам, нисэх буудал, үйлдвэрлэл, үйлчилгээний эх үүсвэрийг бүртгэнэ.

0 0 0

6.4. Бүртгэлд эх үүсвэрийн байршил, төрөл, ашиглагч, үйл ажиллагааны цаг, хэмжилтийн мэдээлэл, өртөх орчин, эрсдэлийн ангиллыг тусгана. Бүртгэлд хамруулах шалгуур, мэдээллийн бүрдэл, шинэчлэх журмыг энэ хуулийн 25.1.2-т заасан журмаар тогтооно.

0 0 0

6.5. Эх үүсвэрийг бүртгэх нь үйл ажиллагаа эрхлэх зөвшөөрөл олгох, эсхүл дуу чимээний хүлцэх түвшинг хэтрүүлэх эрх олгох үндэслэл болохгүй.

0 0 0

7 дугаар зүйл. Дуу чимээний хүлцэх түвшин

0 0 0

7.1. Ажлын байрны дуу чимээний бохирдлын түвшин гадаад орчинд 60 дБа, дотоод орчинд 45 дБа-аас хэтрэхгүй байна.

0 0 0

7.2. Байгаль орчны дуу чимээний бохирдлын түвшин 70 дБА-аас хэтрэхгүй байна.

0 0 0

7.3. Нийтийн зориулалттай орон сууцан дахь дуу чимээний даралтын түвшин 40 дБА-аас хэтрэхгүй байна.

0 0 0

7.4. Амины орон сууцны болон хувийн эзэмшлийн газарт дуу чимээний эх үүсвэр ашиглаж байгаа тохиолдолд дуу чимээний даралтын түвшин 5 дБА-аас хэтрэхгүй байна.

0 0 0

7.5. Нийслэлийн Иргэдийн төлөөлөгчдийн хурлаас баталсан бүсчлэлд хамаарах бүсэд байрлах орон сууц, олон нийтийн барилгын ногоон байгууламжийн бүс дэх дуу чимээний түвшин орчны дуу чимээний түвшингээс 6 дБА-аас хэтрэхгүй байна.

0 0 0

7.6. Төмөр замын дуу чимээний даралтын түвшин 54 дБА-аас хэтрэхгүй байна.

0 0 0

7.7. Автотээврийн хэрэгслээс үүсэн дуу чимээний зөвшөөрөгдөх түвшин буюу хүлцэх хэмжээ нь тээврийн хэрэгслийн төрлөөс хамааран автомашины дуу чимээний даралтын түвшин 88 дБА-гаас хэтрэхгүй байна.

0 0 0

7.8. Худалдаа, үйлчилгээний газраас үүсэх дуу чимээ нь орон сууцны барилгад дуу чимээний бохирдол үүсгэхгүй байх бөгөөд түүнээс 100 м-ийн зайнд байрлаж, дуу чимээний зөвшөөрөгдөх хэмжээ 50 дБА-ээс хэтрэхгүй байна.

0 0 0

7.9. Нисэх онгоцны дуу чимээний даралтын түвшин 45 дБА-аас дээшгүй байна.

0 0 0

8 дугаар зүйл. Дуу чимээний бүсчлэл

0 0 0

8.1. Дуу чимээний бүсчлэлийг газар ашиглалт, хүн амын суурьшил, орчны зориулалт, одоогийн болон төлөвлөсөн эх үүсвэр, зураглал, эрсдэлийн үнэлгээнд үндэслэн тогтооно.

0 0 0

8.2. Бүсчлэлд орон сууц, боловсрол, эрүүл мэнд, асрамжийн байгууллага, үйлдвэрлэл, худалдаа, үйлчилгээ, тээврийн дэд бүтэц, амралт, ногоон байгууламж болон ан амьтны хамгаалалтад ач холбогдолтой орчныг ялган тусгана.

0 0 0

8.3. Аймаг, нийслэлийн Засаг дарга бүсчлэлийн төслийг сум, дүүргийн Засаг дарга, олон нийтээс санал авсны үндсэн дээр боловсруулж, тухайн шатны иргэдийн Төлөөлөгчдийн Хуралд өргөн мэдүүлнэ.

0 0 0

9 дүгээр зүйл. Чимээгүй бүсийн хамгаалалт

0 0 0

9.1. Нийслэлийн нутаг дэвсгэр дэх эмнэлэг, сургууль, цэцэрлэг, ахмад настны болон бусад асрамжийн газар, орон сууцны орчныг хамгаалах чимээгүй бүсийг Нийслэлийн иргэдийн Төлөөлөгчдийн Хурал тогтооно. Аймаг, сумын нутаг дэвсгэрт чимээгүй бүсийг эрсдэлийн үнэлгээнд үндэслэн тухайн шатны иргэдийн Төлөөлөгчдийн Хурал тогтоож болно.

0 0 0

9.2. Чимээгүй бүсийн хил зааг, хамгаалалтын шаардлагыг тухайн орчны зориулалт, өртөлт, эх үүсвэр, газар зүйн нөхцөл, хамгаалах хүн амын онцлогт үндэслэн тодорхойлно.

0 0 0

9.3. Чимээгүй бүсийн төслийг аймаг, нийслэлийн Засаг дарга байгаль орчин, эрүүл мэнд, хот байгуулалтын асуудал хариуцсан байгууллагын дүгнэлт, оршин суугч болон байгууллагын саналыг үндэслэн боловсруулна.

0 0 0

9.4. Чимээгүй бүсэд хүлцэх түвшинг хэтрүүлэх, хамгаалалтын шийдвэрээр тогтоосон хязгаарлалтыг зөрчихийг хориглоно.

0 0 0

9.5. Чимээгүй бүс тогтоогоогүй нь орон сууц, сургууль, эмнэлэг, асрамжийн орчинд хамаарах дуу чимээний ердийн хамгаалалтын шаардлагын зөрчлөөс чөлөөлөх үндэслэл болохгүй.

0 0 0

ГУРАВДУГААР БҮЛЭГ
ДУУ ЧИМЭЭНИЙ БОХИРДЛООС УРЬДЧИЛАН СЭРГИЙЛЭХ

10 дугаар зүйл. Дуу чимээний бохирдлоос урьдчилан сэргийлэх

0 0 0

10.1. Дуу чимээний бохирдлоос урьдчилан сэргийлэх хүрээнд дараах арга хэмжээг хэрэгжүүлнэ:

0 0 0

10.1.1. Хот, суурин газрын хөгжлийн болон газар ашиглалтын төлөвлөлтөд дуу чимээний бохирдлоос урьдчилан сэргийлэх нөхцөл, шаардлагыг тусгах;

0 0 0

10.1.2. зам тээвэр, үйлдвэрлэл, барилга, худалдаа, үйлчилгээ болон бусад үйл ажиллагаанаас үүсэх дуу чимээг эх үүсвэр дээр нь бууруулах, тархалтыг хязгаарлах;

0 0 0

10.1.3. орон сууц, сургууль, цэцэрлэг, эмнэлэг, асрамжийн байгууллага болон дуу чимээний нөлөөлөлд мэдрэмтгий бусад орчныг хамгаалах;

0 0 0

10.1.4. дуу чимээ бага үүсгэдэг техник, технологи, дэд бүтэц, барилга байгууламжийн шийдэл, хэрэглээг дэмжих.

0 0 0

11 дүгээр зүйл. Үйл ажиллагааг төлөвлөх үеийн дуу чимээний үнэлгээ

0 0 0

11.1. Байгаль орчинд нөлөөлөх байдлын үнэлгээнд хамрагдах төслийн дуу чимээний нөлөөллийг уг үнэлгээний хүрээнд судалж, өртөх хүн ам, чимээгүй бүс, ан амьтны амьдрах орчин, бууруулах арга хэмжээг тусгана.

0 0 0

11.2. Өндөр эрсдэлтэй эх үүсвэрийг шинээр ашиглах, өргөтгөх, технологи, үйл ажиллагааны цагийг өөрчлөхөөр төлөвлөсөн бол өөрчлөлтийн дуу чимээний эрсдэлийг урьдчилан үнэлж, хамгаалалтын арга хэмжээг төлөвлөнө.

0 0 0

11.3. Холбогдох хуульд заасан байгаль орчин, хот байгуулалт, барилгын үнэлгээ, зураг төсөл, магадлалд шаардлагатай дуу чимээний мэдээллийг бүрэн тусгана.

0 0 0

12 дугаар зүйл. Барилга байгууламж болон барилгын ажлын шаардлага

0 0 0

12.1. Барилга байгууламжийн зураг төсөл, угсралт, ашиглалтад холбогдох хууль болон норм, норматив, техникийн зохицуулалтын дуу чимээнээс хамгаалах шаардлагыг хангана.

0 0 0

12.2. Барилгын захиалагч, гүйцэтгэгч барилга угсралт, засвар, өргөтгөл, шинэчлэл, буулгалтаас үүсэх дуу чимээний эх үүсвэр, нөлөөлөх орчин, ажиллах цаг, бууруулах арга хэмжээг ажил эхлэхээс өмнө төлөвлөж, хэрэгжилтийг хариуцна.

0 0 0

12.3. Үйл ажиллагаандаа эрсдэлд тохирсон дуу тусгаарлах хаалт, бага дуу чимээтэй тоног төхөөрөмж, тоног төхөөрөмжийн засвар үйлчилгээг хариуцаж, ажлын дараалал, цагийн зохицуулалтыг баримтална.

0 0 0

12.4. Орон сууц, чимээгүй бүсэд нөлөөлөх ажлын хугацаа, цаг, хамгаалалтын арга хэмжээ, хариуцах этгээдийн холбоо барих мэдээллийг нөлөөлөлд өртөх оршин суугч, байгууллагад урьдчилан мэдээлнэ.

0 0 0

12.5. Барилгын зураг төсөлд дуу тусгаарлалт, агааржуулалт, инженерийн тоног төхөөрөмжийн дуу болон чичиргээний хамгаалалтын тооцоог холбогдох шаардлагын дагуу тусгаж, барилга ашиглалтад оруулах үед шаардлагатай хэмжилтээр шалгана.

0 0 0

13 дугаар зүйл. Нийтийн зориулалттай орон сууц, амины орон сууцан дахь дуу чимээний шаардлага

0 0 0

13.1. Орон сууцны өмчлөгч, эзэмшигч, ашиглагч нь засвар, ахуйн тоног төхөөрөмж, дуу өсгөгч болон бусад үйл ажиллагаанаас үүсэх дуу чимээг орон сууцны дотоод болон гадаад орчинд хамаарах хүлцэх түвшнээс хэтрүүлэхгүй байна.

0 0 0

13.2. Орой, шөнийн цаг болон чимээгүй бүсэд дуу чимээ ихтэй засвар, үйлчилгээ, ачилт, буулгалтын ажил явуулахдаа энэ хуулийн 7, 9 дүгээр зүйлд заасан хязгаарлалтыг мөрдөнө.

0 0 0

13.3. Нийтийн зориулалттай орон сууцанд тухайн өдрийн 22:00 цагаас 06:00 цаг хүртэлх хугацаанд оршин суугчдын амгалан, тайван байдлыг алдагдуулан засвар, үйлчилгээ, тохижилтын ажил хийхийг хориглоно.

0 0 0

13.4. Сууц өмчлөгчдийн холбоо, орон сууцны ашиглалт хариуцсан байгууллага дуу чимээний талаарх мэдээллийг хүлээн авч, өөрийн хариуцах тоног төхөөрөмж, үйлчилгээний асуудлыг шийдвэрлэж, төрийн хяналт шаардсан асуудлыг эрх бүхий байгууллагад шилжүүлнэ.

0 0 0

13.5. Гамшиг, гамшгийн онцгой нөхцөл байдлын үеэс бусад тохиолдолд төв суурин газар буюу гэр хороолол, орон сууцны хороололд шөнийн цагаар дуут дохиог ашиглахыг хориглоно.

0 0 0

14 дүгээр зүйл. Автотээвэр, авто замын шаардлага

0 0 0

14.1. Автотээврийн хэрэгслийн дуу чимээний техникийн шаардлагын хяналтыг Автотээврийн тухай хууль болон холбогдох техникийн үзлэгийн зохицуулалтын хүрээнд хэрэгжүүлнэ.

0 0 0

14.2. Авто замын хөдөлгөөний орчны өртөлтийг замын хөдөлгөөний эрчим, бүтэц, хурд, замын гадарга, барилга, хүн амын байршлыг харгалзан хэмжиж, тооцоолно.

0 0 0

14.3. Замын ашиглалт, хөдөлгөөний зохион байгуулалт хариуцсан байгууллага зураглал, эрсдэлийн үнэлгээнд үндэслэн замын засвар, дуу тусгаарлах шийдэл, хөдөлгөөний зохион байгуулалтын арга хэмжээг төлөвлөн хэрэгжүүлнэ. Хурд, чиглэл, цагийн зохицуулалтыг замын хөдөлгөөний аюулгүй байдлын хууль тогтоомжийн дагуу шийдвэрлэнэ.

0 0 0

14.4. Дуут дохио, тусгай дуут дохио ашиглах харилцааг Замын хөдөлгөөний аюулгүй байдлын тухай хууль, холбогдох дүрмийн дагуу зохицуулна.

0 0 0

14.5. Автотээврийн хэрэгслийн өмчлөгч, эзэмшигч, ашиглагч нь дуу намсгах тоног төхөөрөмжийг хэвийн байлгаж, хамаарах техникийн шаардлагыг мөрдөнө.Дуу чимээг нэмэгдүүлэх зорилгоор уг тоног төхөөрөмжийг салгах, өөрчлөхийг хориглоно.

0 0 0

14.6. Автотээврийн хэрэгслийн өмчлөгч, эзэмшигч, жолооч нь автотээврийн хэрэгслийн дуу чимээний зөвшөөрөгдөх дээд хэмжээ, тогтоосон тоног төхөөрөмжийн стандартыг зөрчихийг хориглоно.

0 0 0

15 дугаар зүйл. Төмөр замын дуу чимээний шаардлага

0 0 0

15.1. Төмөр замын суурь бүтэц эзэмшигч, тээвэрлэгч нь өөрийн хариуцах зам, байгууламж, хөдлөх бүрэлдэхүүн, ачилт, буулгалт, сэлгээний ажиллагаанаас үүсэх дуу чимээг бууруулах арга хэмжээг хэрэгжүүлнэ.

0 0 0

15.2. Төмөр замын дуу чимээний зураглал, хяналт-шинжилгээнд суурь бүтэц, хөдөлгөөний эрчим, цагийн хуваарь, хүн амын суурьшил, чимээгүй бүсийн мэдээллийг ашиглана.

0 0 0

15.3. Зам, хөдлөх бүрэлдэхүүний засвар үйлчилгээ, дуу тусгаарлах байгууламж, хөдөлгөөний зохион байгуулалтын арга хэмжээг дуу чимээний үнэлгээ, төмөр замын техникийн болон аюулгүй байдлын шаардлагад үндэслэнэ.

0 0 0

15.4. Төмөр замын хурд, хөдөлгөөний чиглэл, цагийн хуваарь болон аюулын дохиотой холбоотой арга хэмжээг Төмөр замын тээврийн тухай хууль, хөдөлгөөний аюулгүй байдлын шаардлагыг хангана.

0 0 0

15.5. Дуу чимээний эх үүсвэр бүхий. хурдын зам, төмөр зам, үйлдвэрлэлийн бүс орчим дахь орон сууц болон цэцэрлэг, сургуулийн орчимд дуу тусгаарлах хаалт хийнэ.

0 0 0

16 дугаар зүйл. Нисэх онгоц, нисэх буудлын дуу чимээний шаардлага

0 0 0

16.1. Нисэх буудлын үйл ажиллагаа эрхлэгч, агаарын тээвэрлэгч нь өөрийн үйл ажиллагаанаас үүсэх дуу чимээний өртөлтийг үнэлж, нисэхийн аюулгүй байдлыг ханган бууруулах арга хэмжээ хэрэгжүүлнэ.

0 0 0

16.2. Нисэх буудлын орчмын зураглалд агаарын хөлгийн төрөл, нислэгийн тоо, маршрут, цагийн мэдээлэл, газрын үйл ажиллагааны эх үүсвэр, хүн амын өртөлтийг тусгана.

0 0 0

16.3. Агаарын хөлгийн дуу чимээний гэрчилгээ, техникийн шаардлагыг Иргэний нисэхийн тухай хууль болон Монгол Улсад үйлчлэх олон улсын гэрээ, холбогдох дүрмийн хүрээнд мөрдөнө. Эдгээр шаардлага нь нисэх буудлын орчны өртөлтийг үнэлэхийг орлохгүй.

0 0 0

16.4. Нислэгийн ажиллагааны хязгаарлалт, маршрут, цагийн зохицуулалтыг нисэхийн эрх бүхий байгууллага холбогдох хууль тогтоомж, аюулгүй байдлын шаардлагын хүрээнд шийдвэрлэнэ.

0 0 0

17 дугаар зүйл. Үйлдвэрлэл, худалдаа, үйлчилгээний шаардлага

0 0 0

17.1. Үйлдвэрлэл, худалдаа, үйлчилгээ эрхлэгч нь тоног төхөөрөмж, агааржуулалт, хөргөлт, тээвэрлэлт, ачилт, буулгалт, дуу өсгөгчөөс үүсэх дуу чимээг өөрийн үйл ажиллагааны гаднах өртөх орчинд хамаарах хүлцэх түвшнээс хэтрүүлэхгүй байна.

0 0 0

17.2. Дуу чимээг бууруулах арга хэмжээг тоног төхөөрөмжийн онцлог, барилгын хийц, нөлөөлөх орчин, ажиллах цаг, хэмжилтийн үр дүнд үндэслэнэ.

0 0 0

17.3. Орон сууцтай залгаа, эсхүл нэг барилгад үйл ажиллагаа явуулдаг хуулийн этгээд барилгын хийцээр дамжих дуу, чичиргээ болон инженерийн тоног төхөөрөмжийн нөлөөллийг үнэлж, бууруулах арга хэмжээ авна.

0 0 0

17.4. Өндөр эрсдэлтэй эх үүсвэр ашиглагч нь дотоод хяналт, хэмжилт, бууруулах арга хэмжээг авах бөгөөд энэ хуулийн 24 дүгээр зүйлд заасны дагуу мэдээллийг хүргүүлнэ.

0 0 0

18 дугаар зүйл. Олон нийтийн арга хэмжээний шаардлага

0 0 0

18.1. Олон нийтийн арга хэмжээ зохион байгуулагч нь арга хэмжээний байршил, хугацаа, дуу өсгөгчийн байрлал, нөлөөлөлд өртөх орчин, дуу чимээг хянах болон бууруулах арга хэмжээг урьдчилан төлөвлөнө.

0 0 0

18.2. Зохион байгуулагч нь хамаарах хүлцэх түвшин, цагийн болон чимээгүй бүсийн хязгаарлалтыг мөрдөж, дуу өсгөгчийн түвшнийг хянах, шаардлагатай үед бууруулах хариуцсан ажилтантай байна.

0 0 0

18.3. Өндөр эрсдэлтэй арга хэмжээний хэмжилтийг арга хэмжээний явцад зохион байгуулж, хэтрэлт тогтоогдвол дууны түвшнийг нэн даруй бууруулна.

0 0 0

18.4. Арга хэмжээ зохион байгуулахтай холбоотой бусад хуульд заасан зөвшөөрөл авсан нь дуу чимээний хүлцэх түвшин, хамгаалалтын шаардлагыг зөрчих эрх олгохгүй.

0 0 0

19 дүгээр зүйл. Ажлын байрны дуу чимээний шаардлага

0 0 0

19.1. Ажил олгогч нь Хөдөлмөрийн аюулгүй байдал, эрүүл ахуйн тухай хуулийн 28 дугаар зүйлийн 28.1.4, 28.1.5-д заасан эрсдэлийн болон хөдөлмөрийн нөхцөлийн үнэлгээнд дуу чимээний өртөлтийг хамруулна.

0 0 0

19.2. Ажлын байрны өртөлтийг ажлын ээлжийн үргэлжлэх хугацаа, ажилтны байршил, гүйцэтгэх ажил, дуу чимээний дундаж болон оргил түвшин, давтамжийг харгалзан үнэлнэ.

0 0 0

19.3. Ажил олгогч нь эх үүсвэрийн дуу чимээг бууруулах, инженерийн хамгаалалт, ажлын зохион байгуулалтыг сайжруулах арга хэмжээ авч, эрсдэлд тохирсон хамгаалах хэрэгслээр хангана.

0 0 0

19.4. Ажилтны сургалт, эрүүл мэндийн үзлэг, хөдөлмөрийн нөхцөлийн хяналт, хамгаалалтын арга хэмжээний санхүүжилтийг хөдөлмөрийн аюулгүй байдал, эрүүл ахуйн хууль тогтоомжийн хүрээнд хэрэгжүүлнэ.

0 0 0

19.5. Ажилтны өртөлтөд зориулсан хязгаарыг орон сууц, гадаад орчны дуу чимээний хязгаараар орлуулахгүй.

0 0 0

ДӨРӨВДҮГЭЭР БҮЛЭГ
ХЯНАЛТ-ШИНЖИЛГЭЭ, ҮНЭЛГЭЭ, ЗУРАГЛАЛ

20 дугаар зүйл.. Хяналт-шинжилгээ, хэмжилт

0 0 0

20.1. Аймаг, нийслэлийн Засаг дарга нутаг дэвсгэрийн дуу чимээний хяналт-шинжилгээний хөтөлбөрийг байгаль орчин, эрүүл мэнд болон холбогдох салбарын төрийн захиргааны төв байгууллагын саналыг үндэслэн баталж, хэрэгжилтийг зохион байгуулна.

0 0 0

20.2. Хяналт-шинжилгээний хөтөлбөрт хэмжилтийн цэг, эх үүсвэр, үзүүлэлт, өдөр, орой, шөнийн хамралт, улирлын ялгаа, хэмжилтийн давтамж, тасралтгүй хэмжилт шаардах байршил, хариуцах этгээд, мэдээллийн чанарын хяналт, санхүүжилтийг тусгана.

0 0 0

20.3. Өндөр эрсдэлтэй эх үүсвэр, чимээгүй бүс болон хүн ам олноор өртөх орчныг хяналт-шинжилгээнд тэргүүн ээлжид хамруулна. Хэмжилтийн давтамжийг эрсдэлийн ангилал, эх үүсвэрийн ажиллагаатай уялдуулан энэ хуулийн 25.1.2-т заасан журмаар тогтооно.

0 0 0

20.4. Дуу чимээний хэмжилтийг холбогдох аргачлалын дагуу Хэмжил зүйн тухай хуульд заасан шаардлага хангасан, хүчинтэй шалгалт баталгаажуулалт бүхий хэмжих хэрэгслээр гүйцэтгэнэ.

0 0 0

20.5. Хэмжилтийн тайланд байршил, огноо, цаг, үргэлжлэх хугацаа, эх үүсвэрийн ажиллагаа, орчны нөхцөл, хэмжих хэрэгслийн мэдээлэл, аргачлал, үзүүлэлт, хэмжилтийн тодорхой бус байдал, харьцуулсан хэм хэмжээг тусгана.

0 0 0

20.6. Албан хэмжилт, үнэлгээг гүйцэтгэгч нь хэрэглэсэн аргачлал, хэмжих хэрэгсэл, ажилтны мэргэжлийн чадавх, үр дүнгийн чанарыг баримтжуулна. Хууль, техникийн зохицуулалтаар итгэмжлэл шаардсан хэмжилт, сорилтыг зохих хүрээнд итгэмжлэгдсэн байгууллага гүйцэтгэнэ.

0 0 0

20.7. Хүлцэх түвшнээс хэтэрсэн эсэхийг тогтоохдоо энэ зүйлийн шаардлага хангасан хэмжилт, үнэлгээнд үндэслэнэ.

0 0 0

20.8. Орчны хяналт-шинжилгээийн үр дүнг төрийн хяналт шалгалтын эрсдэлийн үнэлгээнд ашиглана. Төрийн хяналт шалгалтыг Төрийн хяналт шалгалтын тухай хуульд заасан үндэслэл, журмын дагуу явуулна.

0 0 0

21 дүгээр зүйл. Өртөлт, эрсдэлийн үнэлгээ

0 0 0

21.1. Аймаг, нийслэлийн Засаг дарга хяналт-шинжилгээ, эх үүсвэрийн бүртгэл, зураглалд үндэслэн нутаг дэвсгэрийн дуу чимээний өртөлт, эрсдэлийг жил бүр үнэлүүлнэ.

0 0 0

21.2. Үнэлгээнд хэтрэлтийн хэмжээ, өртөлтийн хугацаа, давтамж, хүн амын тоо, хүүхэд, өндөр настан, өвчтөн зэрэг эмзэг бүлэг, чимээгүй бүс, ан амьтны амьдрах орчин, эх үүсвэрийн нийлмэл нөлөөллийг харгалзана.

0 0 0

21.3. Эрсдэлийн ангиллын шалгуур, үнэлгээний шалгуур нөхцөл, шаардлагыг энэ хуулийн 25.1.2-т заасан журмаар тогтооно. Эх үүсвэрийг зөвхөн салбарын нэрээр нь өндөр эрсдэлтэй гэж ангилахгүй.

0 0 0

21.4. Өндөр эрсдэлтэй эх үүсвэрийн ангиллыг хэмжилт, үнэлгээний үндэслэлтэй нь эх үүсвэрийг ашиглагчид мэдэгдэж, мэдээллийн санд тусгана. Ангиллыг бууруулах арга хэмжээний үр дүн, нөхцөл өөрчлөгдсөн эсэхэд үндэслэн шинэчилнэ.

0 0 0

21.5. Хүн амын эрүүл мэндийн нөлөөллийн эрсдийн үнэлгээг эрүүл мэндийн байгууллага, ан амьтан, амьдрах орчны нөлөөллийн эрсдлийн үнэлгээг байгаль орчны байгууллага тус тус мэргэжлийн чиг үүргийн хүрээнд гүйцэтгэнэ.

0 0 0

22 дугаар зүйл. Дуу чимээний зураглал

0 0 0

22.1. Аймаг, нийслэлийн Засаг дарга нутаг дэвсгэрийн дуу чимээний зураглалыг таван жил тутам боловсруулж, шинэчилнэ. Зураглалд хамруулах нутаг дэвсгэр, эх үүсвэрийн эрэмбийг хүн амын өртөлт, эрсдэлд үндэслэн тогтооно.

0 0 0

22.2. Нийслэлийн нутаг дэвсгэр дэхдуу чимээний зураглалд хүн амын суурьшил, чимээгүй бүс, гол авто зам, төмөр зам, нисэх буудлын нөлөөллийн орчин, үйлдвэрлэл, худалдаа, үйлчилгээ болон өндөр эрсдэлтэй эх үүсвэрийг хамруулна.

0 0 0

22.3. Дуу чимээний зураглалд дараах мэдээллийг тусгана:

0 0 0

22.3.1.эх үүсвэрийн төрөл, газар зүйн байршил, ажиллагааны онцлог; 22.3.2.өдөр, орой, шөнийн түвшин, шаардлагатай нийлмэл үзүүлэлт, тархалтын хүрээ; 22.3.3.хамаарах хүлцэх түвшин, хэтэрсэн байршил, хэтрэлтийн хэмжээ; 22.3.4.түвшний ангилал тус бүрд өртөх хүн амын тоо, эмзэг бүлэг, өртөх барилга, байгууллага; 22.3.5.ан амьтны өртөх зүйлийн тархац, амьдрах орчин, боломжтой өгөгдөлд үндэслэн тооцсон тоо, нягтшил болон өртөлтийн шинж; 22.3.6.чимээгүй бүс, бүсчлэл, бууруулах арга хэмжээ хэрэгжүүлсэн байршил; 22.3.7.хэмжилт, тооцооллын арга, өгөгдлийн эх сурвалж, хамрах хугацаа, тодорхой бус байдал.

0 0 0

22.4. Ан амьтны тоо, хүн амын өртөлтийн мэдээлэл хангалтгүй бол мэдээллийн хязгаарлалт, тооцооллын таамаглал, тодорхой бус байдлыг зураглалд тусгаж, нөхөн судлах ажлыг төлөвлөнө.

0 0 0

22.5. Эх үүсвэр, суурьшил, дэд бүтэц, өртөлт мэдэгдэхүйц өөрчлөгдсөн бол зураглалын холбогдох хэсгийг таван жилийн хугацаа дуусахаас өмнө шинэчилнэ.

0 0 0

22.6. Дуу чимээний зураглалд хамаарах хүн, хуулийн этгээдийн мэдээллийг холбогдох хуульд заасны дагуу нээлттэй байршуулж, газар ашиглалт, хот байгуулалт, тээвэр, барилга, хамгаалалтын шийдвэрт ашиглана.

0 0 0

23 дугаар зүйл. Дуу чимээг бууруулах үйл ажиллагааны төлөвлөгөө

0 0 0

23.1. Аймаг, нийслэлийн Засаг дарга зураглал, хяналт-шинжилгээ, эрсдэлийн үнэлгээнд үндэслэсэн таван жилийн үйл ажиллагааны төлөвлөгөөг боловсруулж, тухайн шатны иргэдийн Төлөөлөгчдийн Хуралд батлуулахаар өргөн мэдүүлнэ.

0 0 0

23.2. Төлөвлөгөөний төсөлд иргэн, хуулийн этгээд, салбарын болон эрүүл мэнд, байгаль орчны байгууллагын саналыг авч, саналыг тусгасан эсэх болон үндэслэлийг нийтэд мэдээлнэ.

0 0 0

23.3. Төлөвлөгөөнд зорилтот байршил, эх үүсвэр, бууруулах түвшин, өртөлтийг багасгах зорилт, арга хэмжээ, хариуцах этгээд, хэрэгжүүлэх хугацаа, зардал, санхүүжилтийн эх үүсвэр, үр дүнгийн шалгуур үзүүлэлтийг тусгана.

0 0 0

23.4. Төлөвлөгөөг хөгжлийн бодлого, төлөвлөлт болон төсвийн хууль тогтоомжийн дагуу холбогдох төлөвлөгөө, төсөвтэй уялдуулан хэрэгжүүлнэ.

0 0 0

23.5. Төлөвлөгөөний хэрэгжилтийг жил бүр үнэлж, хэмжилтийн өмнөх болон дараах түвшин, хэтрэлттэй байршлын өөрчлөлт, өртөх хүн ам, эмзэг бүлэг, ан амьтны өртөлтийн өөрчлөлтөөр үр дүнг тооцно.

0 0 0

23.6. Төлөвлөгөөг таван жил тутам шинэчилж, шаардлагатай бол хяналт-шинжилгээ, эрсдэлийн үнэлгээний үр дүнд үндэслэн хугацааны дунд өөрчилж болно.

0 0 0

23.7. Өндөр эрсдэлтэй эх үүсвэр ашиглагч нь өөрийн бууруулах арга хэмжээний төлөвлөгөөг нутаг дэвсгэрийн төлөвлөгөөтэй уялдуулж, хэрэгжилтийг тайлагнана.

0 0 0

24 дүгээр зүйл. Мэдээллийн сан

0 0 0

24.1. Дуу чимээний эх үүсвэр, бүсчлэл, чимээгүй бүс, хэмжилт, хяналт-шинжилгээ, эрсдэлийн үнэлгээ, зураглал, төлөвлөгөө, хэрэгжилтийн мэдээлэл бүхий нэгдсэн мэдээллийг Байгаль орчныг хамгаалах тухай хуульд заасан мэдээллийн санд нэгдэнэ.

0 0 0

24.2. Аймаг, нийслэлийн Засаг дарга Байгаль орчныг хамгаалах тухай хуульд заасан журмын дагуу мэдээллийг хүргүүлнэ.

0 0 0

24.3. Салбарын төрийн байгууллага, дэд бүтцийн ашиглалт хариуцсан байгууллага, өндөр эрсдэлтэй эх үүсвэр ашиглагч нь өөрийн чиг үүрэгт хамаарах мэдээллийг энэ хуулийн 25.1.2-т заасан бүрдэл, хугацаа, хэлбэрээр хүргүүлнэ.

0 0 0

24.4. Мэдээлэл нийлүүлэгч нь өөрийн өгсөн мэдээллийн үнэн зөв, бүрэн байдлыг хариуцна. Мэдээллийн сан хариуцагч нь мэдээллийн чанарыг шалгах, засварын түүхийг хадгалах, давхардлыг арилгах, аюулгүй байдлыг хангах ажлыг зохион байгуулна.

0 0 0

24.5. Байгаль орчны асуудал эрхэлсэн төрийн захиргааны төв байгууллага улсын хэмжээний дуу чимээний төлөв байдал, өртөлт, бууруулах арга хэмжээний үр дүнгийн тайланг жил бүр нэгтгэн нийтэд мэдээлнэ.

0 0 0

24.6. Зураглал, хэм хэмжээ, бүсчлэл, хяналт-шинжилгээийн нэгтгэсэн дүн, төлөвлөгөө, хэрэгжилтийн тайланг Нийтийн мэдээллийн ил тод байдлын тухай хуулийн дагуу нээлттэй мэдээлнэ.

0 0 0

24.7. Мэдээллийн сан бүрдүүлэх, ашиглахдаа Хүний хувийн мэдээлэл хамгаалах тухай хууль болон мэдээллийн аюулгүй байдлын холбогдох шаардлагыг мөрдөнө. Өртөлтийн нийтэд нээлттэй мэдээллийг хүн, өрхийг шууд таних боломжгүй байдлаар нэгтгэнэ.

0 0 0

ТАВДУГААР БҮЛЭГ
ТӨРИЙН БАЙГУУЛЛАГЫН ЧИГ ҮҮРЭГ

25 дугаар зүйл. Засгийн газрын бүрэн эрх

0 0 0

25.1. Засгийн газар дараах бүрэн эрхийг хэрэгжүүлнэ:

0 0 0

25.1.1. дуу чимээний бохирдлыг бууруулах салбар хоорондын бодлого, төлөвлөлтийн уялдааг хангаж, хэрэгжилтийг зохион байгуулах;

0 0 0

25.1.2. эх үүсвэрийн бүртгэл, бүсчлэл, чимээгүй бүс, хяналт-шинжилгээ, эрсдэлийн үнэлгээ, зураглал, үйл ажиллагааны төлөвлөгөө, тайлагналт, мэдээллийн сангийн нийтлэг журмыг батлах;

0 0 0

25.1.3. хяналт-шинжилгээ, зураглал, мэдээллийн сангийн улсын хэмжээний үйл ажиллагааны санхүүжилтийг төсвийн хууль тогтоомжийн дагуу шийдвэрлэх.

0 0 0

25.2. Байгаль орчны асуудал эрхэлсэн төрийн захиргааны төв байгууллага дараах чиг үүргийг хэрэгжүүлнэ:

0 0 0

25.2.1. энэ хуулийн хэрэгжилтийг салбар хооронд уялдуулж, улсын хэмжээний хяналт-шинжилгээ, зураглал, тайлагналтыг нэгтгэн зохион байгуулах;

0 0 0

25.2.2. энэ зүйлийн 25.1.2-т заасан журмын төслийг холбогдох байгууллагатай хамтран боловсруулах;

0 0 0

25.2.3. аймаг, нийслэл, салбарын байгууллагыг арга зүйн мэдээллээр хангах;

0 0 0

25.2.4. улсын хэмжээний үр дүнгийн тайланг жил бүр Засгийн газарт танилцуулж, нийтэд мэдээлэх;

0 0 0

25.2.5. ан амьтан, амьдрах орчны дуу чимээний нөлөөллийн судалгаа, хамгаалалтын арга хэмжээг зохион байгуулах.

0 0 0

26 дугаар зүйл. Салбарын төрийн байгууллагын чиг үүрэг

0 0 0

26.1. Эрүүл мэндийн асуудал эрхэлсэн төрийн захиргааны төв байгууллага хүн амын дуу чимээний өртөлт, эрүүл мэндийн нөлөөллийн үнэлгээний судалгаа, эмзэг бүлгийн хамгаалалт, урьдчилан сэргийлэх зөвлөмж, сургалтыг хариуцна.

0 0 0

26.2. Хөдөлмөрийн асуудал эрхэлсэн төрийн захиргааны төв байгууллага ажлын байрны дуу чимээний өртөлт, хөдөлмөрийн нөхцөл, эрсдэлийн үнэлгээ, ажилтны хамгаалалтын шаардлагын хэрэгжилтийг хөдөлмөрийн аюулгүй байдал, эрүүл ахуйн хууль тогтоомжийн хүрээнд зохион байгуулна.

0 0 0

26.3. Зам, тээврийн асуудал эрхэлсэн төрийн захиргааны төв байгууллага авто зам, автотээвэр, төмөр зам, иргэний нисэхийн дуу чимээний салбарын мэдээлэл, техникийн арга хэмжээ, зураглалд шаардлагатай хөдөлгөөний өгөгдлийг хариуцаж, салбарын төлөвлөгөөтэй уялдуулна.

0 0 0

26.4. Хот байгуулалт, барилгын асуудал эрхэлсэн төрийн захиргааны төв байгууллага бүсчлэл, зураглал, чимээгүй бүсийн хамгаалалтыг хот байгуулалт, барилгын норм, зураг төсөл, ашиглалтын шаардлагатай уялдуулах ажлыг хариуцна.

0 0 0

26.5. Стандартчилал, хэмжил зүйн асуудал хариуцсан байгууллага нь хэмжил зүйн шаардлагыг хангах чиг үүргээ холбогдох хуулийн дагуу хэрэгжүүлнэ.

0 0 0

26.6. Санхүү, төсвийн асуудал эрхэлсэн төрийн захиргааны төв байгууллага санхүүжилтийн саналыг төсвийн хууль тогтоомж, батлагдсан бодлого, төлөвлөлт, зардлын тооцоонд үндэслэн төсөв боловсруулах үйл ажиллагаанд тусган шийдвэрлүүлнэ.

0 0 0

26.7. Салбарын төрийн байгууллага өөрийн мэдээллийг байгаль орчны асуудал эрхэлсэн төрийн захиргааны төв байгууллагад хүргүүлж хамтран ажиллана.

0 0 0

27 дугаар зүйл. Нутгийн өөрөө удирдах болон захиргааны байгууллагын чиг үүрэг

0 0 0

27.1. Аймаг, нийслэлийн иргэдийн Төлөөлөгчдийн Хурал дараах бүрэн эрхийг хэрэгжүүлнэ:

0 0 0

27.1.1.Засаг даргын өргөн мэдүүлсэн бүсчлэл, чимээгүй бүс, таван жилийн үйл ажиллагааны төлөвлөгөөг батлах; 27.1.2.хэрэгжилтийн тайланг жил бүр хэлэлцэж, үр дүнд хяналт тавих; 27.1.3.хуульд заасан бүрэн эрхийн хүрээнд төлөвлөгөөний арга хэмжээний санхүүжилтийг төсвийн тухай хууль тогтоомжийн дагуу шийдвэрлэх.

0 0 0

27.2. Аймаг, нийслэлийн Засаг дарга дараах чиг үүргийг хэрэгжүүлнэ:

0 0 0

27.2.1.эх үүсвэрийн бүртгэл, хяналт-шинжилгээ, өртөлт, эрсдэлийн үнэлгээ, зураглал, тайлагналтыг зохион байгуулах; 27.2.2.бүсчлэл, чимээгүй бүс, төлөвлөгөөний төсөлд олон нийтийн оролцоог хангаж, батлуулахаар өргөн мэдүүлэх; 27.2.3.батлагдсан шийдвэр, төлөвлөгөөг хэрэгжүүлж, мэдээллийг нийтэд болон мэдээллийн нэгдсэн санд хүргүүлэх; 27.2.4.сум, дүүрэг, салбарын төрийн байгууллага, эх үүсвэр ашиглагчийн үйл ажиллагааг уялдуулах.

0 0 0

27.3. Сум, дүүргийн Засаг дарга нутаг дэвсгэрийн эх үүсвэр, өртөлтийн мэдээллийг цуглуулах, чимээгүй бүсийн шаардлага, бууруулах арга хэмжээг хэрэгжүүлэх, иргэдэд мэдээлэх ажлыг аймаг, нийслэлийн төлөвлөгөөтэй уялдуулан зохион байгуулна.

0 0 0

27.4. Баг, хорооны Засаг дарга эх үүсвэр, өртөлтийн талаарх мэдээлэл, иргэний санал, гомдлыг холбогдох байгууллагад хүргүүлж, орон нутгийн арга хэмжээнд иргэдийн оролцоог хангана.

0 0 0

28 дугаар зүйл. Иргэн, хуулийн этгээдийн эрх, үүрэг

0 0 0

28.1. Иргэн, хуулийн этгээд дараах эрхтэй:

0 0 0

28.1.1. дуу чимээний хэм хэмжээ, бүсчлэл, зураглал, хяналт-шинжилгээний нэгтгэсэн дүн, төлөвлөгөө, хэрэгжилтийн талаарх мэдээлэл авах;

0 0 0

28.1.2. бүсчлэл, чимээгүй бүс, үйл ажиллагааны төлөвлөгөөний төсөлд санал өгөх;

0 0 0

28.1.3. дуу чимээний нөлөөллийн талаар мэдээлэл, хүсэлт, гомдол гаргаж, шийдвэрлэлтийн талаар хариу авах;

0 0 0

28.1.4. өөрт хамаарах хэмжилтийн тайлан, эрсдэлийн ангилал, захиргааны шийдвэрийн үндэслэлтэй танилцаж, хуульд заасан журмаар гомдол гаргах;

0 0 0

28.1.5. учирсан хохирлоо хуульд заасан журмаар нөхөн төлүүлэхээр шаардах.

0 0 0

28.2. Хуулийн этгээд нь Хөдөлмөрийн аюулгүй байдал, эрүүл ахуйн тухай хуулийн 28 дугаар зүйлийн 28.2.2-т заасан арга хэмжээг авч хэрэгжүүлэхээс гадна байгууллагынхаа ажилтны эрүүл мэнд, аюулгүй орчинд ажиллах нөхцөлийг бүрдүүлж, ажлын байрны дуу чимээний бохирдлыг бууруулах, хянах хөтөлбөрийг батлан хэрэгжүүлнэ.

0 0 0

28.3. Иргэн, хуулийн этгээд өөрийн үйл ажиллагаанд хамаарах дуу чимээний мэдээлэлийг холбогдох байгууллагад өгөх, хэтрэлтийг арилгах, энэ хуульд заасан хүрээнд хэмжилт, бүртгэл, тайлагналт хийх үүрэгтэй.

0 0 0

28.4. Эх үүсвэр ашиглагч нь дуу чимээг бууруулах арга хэмжээний хэрэгжилтийг хариуцсан ажилтан, эсхүл гэрээгээр үйлчилгээ үзүүлэх этгээдийг ажиллуулж болно.

0 0 0

29 дүгээр зүйл. Мэргэжлийн болон төрийн бус байгууллагын оролцоо

0 0 0

29.1. Мэргэжлийн холбоо, төрийн бус байгууллага судалгаа, сургалт, олон нийтийн мэдээлэл, иргэдийн оролцоо, төлөвлөгөөний хэрэгжилтийн олон нийтийн хяналтад оролцож болно.

0 0 0

29.2. Хэмжилт, зураглал, үнэлгээний ажлыг гэрээгээр гүйцэтгэх бол тухайн ажилд хамаарах мэргэжлийн, хэмжил зүйн болон хуульд заасан бусад шаардлагыг хангана.

0 0 0

ЗУРГАДУГААР БҮЛЭГ
БУСАД

30 дугаар зүйл. Төрийн хяналт

0 0 0

30.1. Энэ хуулийн хэрэгжилтэд байгаль орчин, эрүүл ахуй, хөдөлмөрийн аюулгүй байдал, барилга, зам тээврийн хяналт хэрэгжүүлэх эрх бүхий байгууллага, улсын байцаагч холбогдох хуулиар олгосон эрх хэмжээний хүрээнд хяналт тавина.

0 0 0

30.2. Төлөвлөгөөт хяналт шалгалтыг хяналт-шинжилгээ, эрсдэлийн үнэлгээний мэдээллийг харгалзан Төрийн хяналт шалгалтын тухай хуульд заасан төлөвлөгөө, журмын дагуу хэрэгжүүлнэ. Төлөвлөгөөт бус хяналт шалгалтыг хуульд заасан үндэслэлээр явуулна.

0 0 0

30.3. Эрх бүхий байгууллага хяналтын харьяалал давхардсан асуудлаар мэдээлэл солилцож, өөрийн бүрэн эрхийн хүрээнд хамтран ажиллана.

0 0 0

30.4. Хяналт шалгалтаар тогтоогдсон зөрчлийг тухайн орчинд хамаарах хэм хэмжээ, хэмжилтийн үзүүлэлт, байршил, ажиллагааны нөхцөл, хугацаагаар баримтжуулна.

0 0 0

31 дугаар зүйл. Санхүүжилт

0 0 0

31.1. Төрийн байгууллагын хяналт-шинжилгээ, зураглал, эрсдэлийн үнэлгээ, мэдээллийн сан, төлөвлөгөөний арга хэмжээний санхүүжилтийг улсын болон орон нутгийн төсөв, хуульд нийцсэн бусад эх үүсвэрээс бүрдүүлнэ.

0 0 0