6.1. Хүнсний асуудал эрхэлсэн төрийн захиргааны төв байгууллагын дэргэд зохицуулах үйлчлэлтэй хүнсийг баталгаажуулахад эрсдэлийн үнэлгээнд суурилсан мэргэжлийн дүгнэлт гаргах чиг үүрэг бүхий орон тооны бус зөвлөл ажиллана.
6.2. Энэ хуулийн 6.1-д заасан зөвлөлийн бүрэлдэхүүн, үйл ажиллагааны журмыг хүнсний асуудал эрхэлсэн төрийн захиргааны төв байгууллага батална.
6.3. Хүнсний чиглэлийн үйл ажиллагаа эрхлэгч хуулийн этгээд нь зохицуулах үйлчлэлтэй хүнсийг баталгаажуулахад шаардагдах дараах бичиг баримт, мэдээллийг хүнсний асуудал эрхэлсэн төрийн захиргааны төв байгууллагад хүргүүлнэ:
6.3.1. баталгаажуулах тухай хүсэлт;
6.3.2. Монгол Улсын үндэсний стандартын шаардлагыг хангасан тухай итгэмжлэгдсэн лабораторийн шинжилгээний дүн;
6.3.3. хүнсний бүтээгдэхүүний аюулгүй байдлыг хангасан тухай итгэмжлэгдсэн лабораторийн шинжилгээний дүн;
6.3.4. тухайн хүнсэнд агуулагдаж буй үйлчлэх бодисыг тодорхойлох чанарын болон тоо хэмжээний шинжилгээний арга, шинжилгээний дүнгийн хамт;
6.3.5. зохицуулах үйлчлэлтэй хүнсний эрүүл мэндийн үйлчлэлийг судалж тогтоосон талаарх шинжлэх ухааны үндэслэл бүхий судалгааны тайлан эсхүл оюуны өмчийн гэрчилгээ;
6.3.6. орц, найрлага, илчлэгийн хэмжээ;
6.3.7. тухайн хүнсийг үйлдвэрлэх арга технологи, тоног төхөөрөмж, чанарын хяналтын тогтолцоо;
6.3.8. шошгоны баталгаажуулалт.
6.4. Хүнсний асуудал эрхэлсэн төрийн захиргааны төв байгууллага нь энэ хуулийн 6.1-д заасан зөвлөлийн дүгнэлт, 6.3-т заасан баримт бичгийг үндэслэн зохицуулах үйлчлэлтэй хүнсийг баталгаажуулна.
6.5. Зохицуулах үйлчлэлтэй хүнсний шимт бодисын биологийн идэвхийн болон агууламжийн мэдэгдлийг хэрэглэх, зохицуулах үйлчлэлтэй хүнсийг баталгаажуулах журмыг эрүүл мэндийн болон хүнсний асуудал эрхэлсэн төрийн захиргааны төв байгууллага хамтран батална.
6.6. Зохицуулах үйлчлэлтэй хүнсний баталгаажуулалттай холбоотой маргаан шийдвэрлэх журмыг Засгийн газар батална.
