8.1. Чухал ашигт малтмалын үр өгөөж нь дараах хэлбэртэй байна:
8.1.1. ашигт малтмалын нөөц ашигласны тусгай төлбөр;
8.1.2. төсөлд хөрөнгө оруулах замаар хүртэх ногдол ашиг;
8.1.3. анхны хөрөнгө оруулалтаа нөхсөн төслөөс хүртэх ашиг;
8.1.4. нийтийн зориулалттай болон дэмжих дэд бүтцийн бүтээн байгуулалт;
8.2. Төсөл хэрэгжүүлэгч нь геологи, уул уурхайн асуудал эрхэлсэн төрийн захиргааны байгууллага болон орон нутагтай хамтран чухал ашигт малтмалын төслийн талаарх танилцуулгыг нөлөөлөлд өртөх иргэдэд танилцуулж, төслийн үр өгөөжийг хэрхэн хэрэгжүүлэх асуудлаар санал авна.
8.3. Чухал ашигт малтмалын үр өгөөжийг дараах журмаар тодорхойлж, төвлөрүүлнэ:
8.3.1. геологи, уул уурхайн асуудал эрхэлсэн төрийн захиргааны байгууллага нь энэ хуулийн 7.2.1-д заасан үр өгөөжийн талаарх саналыг геологи, уул уурхайн асуудал эрхэлсэн төрийн захиргааны төв байгууллагад хүргүүлнэ;
8.3.2. геологи, уул уурхайн асуудал эрхэлсэн төрийн захиргааны төв байгууллага нь энэ хуулийн 8.3.1-д заасан саналыг эдийн засаг хөгжлийн болон санхүү, төсвийн асуудал эрхэлсэн төрийн захиргааны төв байгууллагатай хамтран боловсруулж, Засгийн газарт хүргүүлж, шийдвэрлүүлнэ.
8.4. Энэ хуулийн 8.1-д заасан үр өгөөжийг дараах хувь, хэмжээгээр тооцно:
8.4.1. энэ хуулийн 8.1.1-д заасан үр өгөөжийн хувьд Ашигт малтмалын тухай хуулийн 472 дугаар зүйлд тодорхойлсны дагуу;
8.4.2. энэ хуулийн 8.1.2-т заасан үр өгөөжийн хувьд төрөөс оруулсан хөрөнгийн хувиар;
8.4.3. энэ хуулийн 8.1.3-т заасан үр өгөөжийн хувьд төслийн анхны хөрөнгө оруулалтыг нөхөж дууссаны дараагийн жилийн цэвэр ашгаас 10 хувиар.
8.5. Төсөл хэрэгжүүлэгч нь бүс нутгийг хөгжүүлэх төлөвлөгөөнд нийцүүлэн нийтийн зориулалттай болон дэмжих дэд бүтцийн бүтээн байгуулалтыг санхүүжүүлэх замаар энэ хуулийн 8.1.4-т заасан үр өгөөжийг төвлөрүүлж болно.
8.6. Энэ хуулийн 8.5-д заасан дэд бүтцийн санхүүжилтийн дүнгээс хамаарч нэг төслийг хэд хэдэн чухал ашигт малтмалын төсөл хэрэгжүүлэгч болон ашигт малтмалын тусгай зөвшөөрөл эзэмшигч, үйлдвэрлэгч нар хамтран хэрэгжүүлж болно.
8.7. Энэ хуулийн 8.5-д заасан дэд бүтцийн бүтээн байгуулалтыг гүйцэтгэх этгээдийг санхүүжилтэд оролцсон талууд хамтран сонгон шалгаруулж, гүйцэтгэлд захиалагчийн хяналт тавина.
8.8. Энэ хуулийн 8.5-д заасан дэд бүтцийн санхүүжилтэд төрөөс нэмэлт санхүүжилт гаргасан нь тухайн бүтээн байгуулалтын нийт зардлын 50 хувиас хэтрэхгүй бол Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хууль, Төр, хувийн хэвшлийн түншлэлийн тухай хууль хамаарахгүй.