14.1. Малыг тээврийн хэрэгслээр тээвэрлэхдээ малын төрөл, нас, биеийн болон физиологийн байдал, тээвэрлэх зай, хугацаа, улирал, цаг агаарын нөхцөлийг харгалзан малд шаардлагагүй өвдөлт, айдас, стресс, гэмтэл, зовуурь учруулахгүй байх нөхцөлийг бүрдүүлнэ.
14.2. Мал тээвэрлэх тээврийн хэрэгсэл нь малын төрөл, биеийн хэмжээ, тоонд тохирсон зай талбайтай, хальтиргаа, уналт, гэмтлээс хамгаалсан, агааржуулалттай, хэт халуун, хүйтэн, салхи, хур тунадас болон цаг агаарын бусад таагүй нөхцөлөөс зохих хамгаалалттай байна.
14.3. Малыг тээврийн хэрэгсэлд ачих, буулгахдаа айлгах, зодох, чирэх, түлхэх, мушгих, гэмтээх болон шаардлагагүй өвдөлт, зовуурь учруулах арга хэрэглэхийг хориглоно.
14.4. Малыг холын зайд удаан хугацаагаар тээвэрлэхдээ малын тавлаг байдлыг алдагдуулахгүй байх нөхцөлийг хангаж, малын төрөл, нас, биеийн байдал, тээвэрлэлтийн үргэлжлэх хугацаа, улирал, цаг агаарын нөхцөлд тохируулан зохих хугацаанд амраах, услах, шаардлагатай тохиолдолд тэжээх, малын биеийн байдлыг тогтмол шалгах арга хэмжээ авна.
14.5. Малыг холын зайд зохих амралтгүй, усалгаа, шаардлагатай тэжээлгүйгээр тасралтгүй урт хугацаагаар тээвэрлэж, хэт ядраах, тав тухыг нь алдагдуулах, өвдөлт, айдас, стресс, гэмтэл, зовуурь учруулахыг хориглоно.
14.6. Холын зайн тээвэрлэлтийн өмнө тээвэрлэгч нь малын төрөл, тоо, биеийн байдал, тээврийн хэрэгслийн багтаамж, явах зам, тээвэрлэлтийн хугацаа, улирал, цаг агаарын нөхцөл, мал амраах, услах, шаардлагатай тохиолдолд тэжээх цэгийг урьдчилан төлөвлөнө.
14.7. Тээвэрлэлтийн явцад өвчилсөн, гэмтсэн, туйлдсан малыг бусад малаас тусгаарлаж, шаардлагатай тусламж үзүүлнэ.
14.8. Өөрөө явж, зогсож чадахгүй, хүнд гэмтсэн, хүнд өвчтэй, туйлдсан, эсхүл тээвэрлэлтийн улмаас эрүүл мэнд, тавлаг байдал нь ноцтой дордох эрсдэлтэй малыг ердийн нөхцөлөөр тээвэрлэхийг хориглоно.
14.9. Суудлын автомашин, мотоцикл болон мал хөтлөх, туух зориулалтын бус бусад моторт тээврийн хэрэгслээс тэмээ, адуу, үхэр болон бусад малыг уяа, оосор, ногт, бугуйл болон бусад хэрэгслээр холбон хөтөлж, тээврийн хэрэгслийн хурдтай албадан явуулах, давхиулахыг хориглоно.
14.10. Суудлын автомашин, мотоцикл болон бусад моторт тээврийн хэрэгслээр малыг хэт хурдтай, удаан хугацаагаар хөөж туух, амрах боломж олгохгүй албадан явуулах, сүргийг үргээж сарниулах, малд айдас, хэт ядрал, гэмтэл, өвдөлт, зовуурь учруулахыг хориглоно.
14.11. Бэлчээрийн малын ердийн маллагаа, бэлчээр сэлгэх, отор нүүдэл хийхэд мотоцикл болон бусад тээврийн хэрэгсэл ашиглахдаа малын төрөл, нас, физиологийн байдал, газар орны нөхцөлд тохирсон хурд, зайг баримталж, малын тавлаг байдлыг алдагдуулахгүй байна.
14.12. Төл мал, хээлтэй болон төллөсөн мал, өвчтэй, гэмтсэн, хөгшин, туйлдсан малыг моторт тээврийн хэрэгслээр хөөж туухыг хориглоно.
14.13. Гамшиг, гал түймэр, үер, зуд, гоц халдварт өвчин болон мал, хүний амь нас, эрүүл мэндэд шууд аюул учирсан үед малыг аюулгүй газарт яаралтай шилжүүлэхдээ тухайн нөхцөл байдалд тохирсон арга хэрэглэж, малд учруулах өвдөлт, айдас, стресс, гэмтлийг боломжит хамгийн бага хэмжээнд байлгана.
14.14. Мал тээвэрлэх хугацаа, тээврийн хэрэгслийн нэгж талбайд ногдох малын тоо, мал амраах, услах, тэжээх давтамж, ачих, буулгах болон холын зайн тээвэрлэлтийн нарийвчилсан шаардлагыг малын төрөл, нас, физиологийн онцлог, улирал, цаг агаар, тээвэрлэлтийн нөхцөлийг харгалзан эрх бүхий байгууллага батална.
